Tennıs: Kýkýshkın Chendý týrnıriniń ekinshi aınalymyna shyqty
ASTANA. QazAqparat - Qazaqstannyń birinshi, álemniń 87-inshi raketkasy Mıhaıl Kýkýshkın Chendý týrnıriniń alǵashqy aınalymynda amerıkalyq Tennıs Sandgrenmen kúsh synasty, dep habarlaıdy QazAqparat tilshisi.
Qytaı elinde ótip jatqan jarystyń 8-inshi raketkasy bolyp tirkelgen, 27 jasar T.Sandgren dúnıejúzilik reıtıngte bıyl 31-ge tolatyn qazaqstandyq tennısshiden áldeqaıda joǵary, 55-inshi satyda tur.
Birshama tartysty órbigen bastapqy partııada breık jasaı bilgen M.Kýkýshkın óz geımderin de qur jibermeı, 5:3 esebimen alǵa shyqty. Osy basymdylyǵynan aıyrylmaǵan ol bul sette 6:4 esebimen jeńiske jetti.
Ekinshi partııada esep 1:1 bolǵannan keıin amerıkalyq tennısshi dop bergen mezgilde Kýkýshkın tórtinshi breık-poıntyn paıdalana bildi. Alaıda kelesi geımde Sandgren qaıyra breık jasady - 2:2. Degenmen qazaqstandyq sportshy bar sheberligin salyp, taǵy bir breıkke qol jetkizip, óz geımin de aldy - 5:3. Aqyry taǵy bir breıkpen matchty aıaqtady - 6:3.
Kezdesý 1 saǵat 27 mınýtqa sozyldy.
M.Kýkýshkın ekinshi aınalymda taǵy bir amerıkalyq, reıtıngte 62-inshi orynda turǵan, aldaǵy aıda 21 jasqa tolatyn Teılor Harrı Frıtspen sheberlik baıqasady.
Aıta keteıik, júlde qory 1 mln AQSh dollarynan asatyn Chendý týrnıri 30 qyrkúıekte márege jetedi.
