Tennıs: Kýkýshkın álemdik reıtıngte TOP-50 endi
ASTANA. QazAqparat - Qazaqstandyq tennısshi Mıhaıl Kýkýshkın dúısenbide jańartylǵan dúnıejúzilik reıtıngte úzdik elýlikke endi, dep habarlaıdy QazAqparat tilshisi.
M.Kýkýshkın úsh satyǵa kóterilip, álemniń 50-raketkasy atandy.
Qazaqstandyq tennısshi 2015 jyly óz sporttyq jolyndaǵy eń joǵary 46-orynǵa jetken bolatyn. M.Kýkýshkınniń bıylǵy qarqyny jaman emes, sol úzdik kórsetkishin jańartatyndaı múmkindigi bar. Ol úshin bási joǵary halyqaralyq týrnırlerde sátti óner kórsetý kerek. Mysaly, búgin M.Kýkýshkın Frantsııada Marsel týrnıriniń (júlde qory - 668 485 eýro) alǵashqy aınalymynda reıtıngte 61-orynda turǵan amerıkalyq Denıs Kýdlamen kezdesedi. Ony utsa, álemniń 25-raketkasy, kanadalyq Denıs Shapovalovpen kortqa shyǵady.
Álemdik reıtıngte taǵy bir qazaqstandyq Aleksandr Býblık 144-satydan 149-ǵa tómendedi. Ol Býdapesht týrnıriniń chempıony atanǵanymen, sodan keıin Frantsııanyń Sherbýr qalasynda sol jeńisti jolyn jalǵastyra almady.
Áıelder arasynda Qazaqstannyń birinshi raketkasy ıÝlııa Pýtıntseva burynǵy 53-ornynda qaldy. Al Zarına Dııas 96-dan 94-satyǵa kóterildi. Ótken aptada Dýbaıda irikteý saıystaryn sátti ótkizgen Z.Dııas búgin negizgi týrnırdiń (júlde qory - 2,5 mln astam AQSh dollary) alǵashqy aınalymynda álemniń 85-raketkasy, slovenııalyq Dalıla ıAkýpovıchpen kúsh synasady.
Taǵy bir qazaqstandyq tennısshi Elena Rybakına tórt saty joǵarylap, 192-orynǵa jaıǵasty.
Eske sala keteıik, budan buryn qazaqstandyq tennısshilerdiń Dýbaı týrnırindegi qarsylastary anyqtalǵanyn, odan keıin ıÝlııa Pýtıntsevanyń alǵashqy aınalymnan asa almaǵanyn jazǵan bolatynbyz.
