Tennıs: Kreml kýbogynan keıin M.Kýkýshkın Bazelde óner kórsetpek
ASTANA. QazAqparat - Ótken aptada tennısten Kreml kýbogy úshin halyqaralyq jarysta sheber oıyn órnegin kórsetken qazaqstandyq Mıhaıl Kýkýshkın taǵy bir iri týrnırge qatyspaq.
Aıta keteıik, M.Kýkýshkın Máskeýdegi dodada fınalǵa bergisiz jartylaı fınalda álemniń úzdik tennısshileriniń biri, horvat Marın Chılıchke qana ese jiberdi. Mıhaıldyń ozyq ónerin osy týrnırdiń jeńimpazy atanǵan M.Chılıchtiń ózi de joǵary baǵalady. Endi qazaqstandyq tennısshi Bazelde 20-26 qazan aralyǵynda ótetin halyqaralyq týrnırde baǵyn synap kórmek. Munyń Kreml kýbogyna qaraǵanda, bási de bıik, júlde qory da (1,458 mln. astam AQSh dollary) qomaqty. Onyń ústine birinshi aınalymdaǵy qarsylasy da asa myqty. Ol - álemniń tórtinshi raketkasy, shveıtsarııalyq Stanıslas Vavrınka. Óz elinde oınaıtyn S.Vavrınka baryn salatyny anyq. Osy týrnırde álemniń ekinshi jáne úshinshi raketkalary, ıspandyq Rafael Nadal men taǵy bir shveıtsarııalyq Rodjer Federer de óner kórsetedi. Sondaı-aq, taǵy bir qazaqstandyq Andreı Golýbev reseılik Teımýraz Gabashvılımen kúsh synasady. Qazaqstandyqtarǵa sáttilik tileıik.
