Tennıs: Qos sportshy ózderiniń týǵan kúninde Garros týrnırinde baq synasty
ASTANA. QazAqparat - Parıjde tennısten ótip jatqan Rolan Garros týrnıriniń jartylaı fınalynda álemniń 47-inshi raketkasy, latvııalyq Elena Ostapenko men dúnıejúzilik reıtıngte 31-inshi satyda turǵan shveıtsarııalyq Tımıa Bachınskı búgin ózderiniń týǵan kúnderinde sheberlik baıqasty, dep habarlaıdy «QazAqparat» tilshisi.
Shveıtsarııalyq tennısshi dál osy kúni 28-ge tolsa, latvııalyq sportshy nebári 20 jastyń bıigine shyqty.
«Eýrosport» telearnasynan tikeleı efırde kórsetkenindeı, birinshi partııada E.Ostapenko taı-breıkte 7:6 (7:4) esebimen basym tústi. Ekinshi partııada T.Bachınskı 6:3 esebimen ese qaıtardy. Úshinshi, sheshýshi partııada qos tennısshiniń de utatyndaı múmkindikteri boldy. Degenmen muny Elena Ostapenko sátti paıdalanyp, 6:3 esebimen jeńiske jetti. Sóıtip 2 saǵat 24 mınýtqa sozylǵan tartysty matchta jastyq jalyn-jigerine qosa sheberligin kórsete bilgen Ostapenko óz sporttyq jolynda alǵash ret «Úlken dýlyǵa» týrnıriniń fınalyna joldama aldy. Bul - Latvııanyń tennıs sporty tarıhyndaǵy ázirge rekordtyq tabys.
Latvııalyq tennısshi senbi kúni fınalda álemniń úshinshi jáne tórtinshi raketkalary, chehııalyq Karolına Plıshkova nemese rýmynııalyq Sımona Haleptiń qaı jeńgenimen oınaıdy.
