Tennıs: Koronavırýsqa baılanysty Argentına–Qazaqstan matchy keıinge shegerildi
NUR-SULTAN. QazAqparat – Halyqaralyq tennıs federatsııasynyń (ITF) sheshimimen Federatsııa kýbogy úshin pleı-off kezeńindegi Argentına – Qazaqstan matchy belgisiz merzimge keıinge shegerildi, dep habarlaıdy QazAqparat tilshisi.
Qazaqstan tennıs federatsııasy málim etkenindeı, álemniń segiz elinde 17-18 sáýir kúnderi ótýge tıis pleı-off týrnıriniń basqa da matchtary keıinge shegerildi.
Týrnırdiń balama merzimderi keıin jarııalanatyn bolady.
Sonymen qatar ITF Majarstanda ótýi tıis Federatsııa kýbogynyń fınalyn da keıinge qaldyrdy. Halyqaralyq tennıs federatsııasy fınaldy ótkizýge nıetti. Sol baǵytta múddeli uıymdarmen kelissózder júrgizilýde.
Oǵan qosa koronavırýs indetiniń taralýyna baılanysty Futures serııasyndaǵy jarystar keminde 20 sáýirge deıin, al Challenger, ATP jáne WTA týrnırleri 2 mamyrǵa deıin ótpeıdi.
Sol sııaqty Nur-Sultan qalasynda erler arasyndaǵy chellendj týrnıri de aıaqtalmaı qaldy.
Eske sala keteıik, budan buryn Andreı Golýbev pen Aleksandr Nedovesovtiń Nur-Sultan týrnıriniń jartylaı fınalyna shyqqanyn jazǵan bolatynbyz.
