Tennıs: Qazaqstandyqtar Úndistandy juptyq kezdesýde de tize búktirdi
ASTANA. QazAqparat - Ulttyq tennıs ortalyǵynda Federatsııa kýbogy úshin ótip jatqan irikteý týrnırinde Qazaqstan - Úndistan matchy juptyq básekemen aıaqtaldy, dep habarlaıdy QazAqparat tilshisi.
Juptyq synǵa Qazaqstannan Anna Danılına men Galına Voskoboeva, Úndistannan Prathana Thombare men Rııa Bhatııa shyqty. Úndistandyqtar jekeleı kezdesýlerde 0:2 esebimen ese jiberip, juptyq báseke eshteńe sheshpeıtindikten, aldyn ala kózdelgendeı, Ankıta Raına jáne Karman Kaýr Thandıdy buǵan qospady.
Qazaqstandyq jup birinshi sette birden breık jasap, 2:0 esebimen alǵa ketti. Sosyn óz geımderin alýmen birge taǵy eki breık jasaı bildi - 6:1. A.Danılına men G.Voskoboeva ekinshi partııany da qarqyndy bastap, 5:0 esebimen uzap ketti. Tek sodan keıin ǵana úndistandyqtarǵa «jan kirdi» - 1:5. Aqyry bul partııany da qazaqstandyq jup 6:1 esebimen támamdady.
Bul kezdesý qazaqstandyqtar úshin jattyǵý sııaqty boldy. Qazaqstan quramasy úshin eń kóp oıyn ótkizgen tájirıbeli G.Voskoboevamen tize qosyp, óner kórsetý A.Danılınaǵa paıdaly bolǵany anyq. Kort ıeleriniń aıqyn basymdyǵymen ótken báseke bir saǵatqa jetken joq. Osylaısha «A» tobynda Taıland pen Úndistandy 3:0 esebimen utqan Qazaqstan quramasy jeńimpaz atandy. Erteń olar «V» tobynda úzdik shyqqan Qytaı quramasymen ekinshi Álemdik toptyń pleı-off kezeńine beriletin joldama úshin talasqa túsedi.
Eske sala keteıik, budan buryn Mıhaıl Kýkýshkınniń Sofııa týrnıriniń shırek fınalyna shyǵa almaǵanyn, al búgin Zarına Dııastyń Qazaqstan - Úndistan matchyn jeńispen bastap, ony ıÝlııa Pýtıntsevanyń jalǵastyrǵanyn jazǵan bolatynbyz.
