Tennıs: Qazaqstandyq jup Horvatııadaǵy týrnırdiń shırek fınalyna shyqty
NUR-SULTAN. QazAqparat – Qazaqstandyqtar Aleksandr Nedovesov pen Andreı Golýbev Horvatııadaǵy Zadar chellendjer týrnıriniń shırek fınalyna shyqty, dep habarlaıdy QazAqparat tilshisi.
Qazaqstan tennıs federatsııasy málim etkenindeı, osy dodanyń 1-raketkasy bolyp tirkelgen A.Nedovesov pen A.Golýbev bastapqy kezdesýin ıtalııalyqtar Marko Bortolottı – Alessandro Djannesımen ótkizdi.
Qazaqstandyq jup 6:4, 6:4 esebimen jeńiske jetti. Olar 1 saǵat 8 mınýtqa sozylǵan básekede eki márte breık jasaı bildi.
A.Nedovesov pen A.Golýbev jartylaı fınalǵa shyǵý úshin bosnııalyq Tomıslav Brkıch – horvatııalyq Nıno Serdarýshıch nemese chehııalyq Vıt Koprıva – ıspanııalyq Nıkolas Sanches juptarynyń qaı jeńgenimen talasady.
Júlde qory 44820 eýroǵa baǵalanǵan Zadar dodasy 27 naýryzda márege jetedi.
Eske sala keteıik, budan buryn qazaqstandyq tennısshilerdiń Maıamı týrnırindegi qarsylastary anyqtalǵanyn, A.Býblık pen M.Kýkýshkınniń kimmen oınaıtyny belgili bolǵanyn, sondaı-aq Zarına Dııastyń álemniń burynǵy birinshi raketkasyn utqanyn jazǵan edik.
