Tennıs: Qazaqstandyq jasóspirimder Azııa reıtıngisinde kósh bastady
NUR-SULTAN. QazAqparat – Azııa tennıs federatsııasy (ATF) jasóspirimder arasynda jańartylǵan reıtıngini jarııa etti, dep habarlaıdy QazAqparat tilshisi.
Qazaqstan tennıs federatsııasy málim etkenindeı, jekeleı synda qazaqstandyqtar kósh bastady.
Uldardan Nur-Sultan qalasyndaǵy tennıs mektebiniń túlegi Erasyl Baqtııar, qyzdardan almatylyq Polına Sleptsova birinshi satyǵa kóterildi.
Erasyl bıyl ATF serııasy boıynsha ótken bes týrnırge qatysty. Tamyzda Shymkentte ótken Shymkent Open ATF14Under Junior Grade A jarysynda qazaqstandyq jas tennısshi chempıon atansa, bir apta buryn Óskemendegi dodada fınalǵa deıin jetti.
Sondaı-aq P.Sleptsova 2021 jyly ATF serııasy boıynsha tórt týrnırge qatysyp, bárinde júldegerler qatarynan kórindi. Shymkent Open ATF14Under Junior Grade A jáne Almaty ATF&14 Under Junior Grade 2 jarystarynda ol jeńimpaz atansa, qalǵan ekeýinde úzdik úshtikke ilikti.
Eske sala keteıik, budan buryn Tımofeı Skatovtyń Ýrýgvaıdaǵy týrnırdiń ekinshi aınalymyna shyqqanyn jazǵan bolatynbyz.
