TENNIS: Qazaqstandyq Z.Dııas Rım týrnırine qatysady
ASTANA. QazAqparat - Qazaqstannyń birinshi, álemniń 32-inshi raketkasy Zarına Dııas 11-17 mamyrda Rım qalasynda tennısten ótetin iri týrnırge qatysady.
Chempıonat.kom saıtynan alynǵan málimetke qaraǵanda, Zarına alǵashqy aınalymda bolgarııalyq Tsvetana Pıronkovamen kúsh synasady. Ony utqan jaǵdaıda álemniń altynshy raketkasy, kanadalyq Ejenı Býsharmen kortqa shyǵady.
Júlde qory 2,7 mln. astam AQSh dollaryn quraıtyn Rım týrnırine álemniń myqty tennısshileri túgelge jýyq qatysqaly otyr.
Aıta keteıik, osynyń aldynda Madrıd týrnırinde Zarına Dııas ıspanııalyq, álemdik satyda onynshy orynda turǵan Karla Sýares-Navarrodan utylyp, birinshi aınalymnan asa almaǵan bolatyn. Bul jarysta chehııalyq Petra Kvıtova jeńimpaz atandy.
