Tennıs: Qazaqstandyq tennısshilerdi utqan jup Aýstralııa chempıony atandy
NUR-SULTAN. QazAqparat – Melbýrnda erler arasynda juptyq synda Aýstralııa ashyq chempıonatynyń jeńimpazy belgili boldy, dep habarlaıdy QazAqparat tilshisi.
Fınalda osy jarystyń 11-raketkasy bolyp tirkelgen amerıkalyq Radjıv Ram men ulybrıtanııalyq Djo Solsberı kort ıeleri Maks Persell men Lıýk Sevılmen kezdesti.
Amerıkalyq-ulybrıtanııalyq jup qarsylastaryn 6:4, 6:2 esebimen utyp, chempıondyq ataqty jeńip aldy.
R.Ram men D.Solsberı jartylaı fınalda úsh setke sozylǵan tartysty matchta qazaqstandyqtar Mıhaıl Kýkýshkın men Aleksandr Býblıktiń jolyn kesken bolatyn. Fınalǵa shyǵýǵa qazaqstandyq jupqa sál ǵana sáttilik jetpeı qaldy.
Degenmen M.Kýkýshkın men A. Býblık Qazaqstan tarıhynda alǵash ret «Úlken dýlyǵa» týrnıriniń jartylaı fınalyna shyqty. Buǵan deıin M.Kýkýshkın juptyq reıtıngte 143- satyda tursa, endi keminde 68-orynǵa kóteriledi. 343-oryndaǵy A.Býblık te juptyq synda úzdik júzdiktiń qataryna enedi.
Erler arasynda jekeleı synda búgin fınalda álemniń 2-raketkasy, serbııalyq Novak Djokovıch pen reıtıngte 5-orynda turǵan aýstrııalyq Domınık Tım sheberlik baıqasady.
Eske sala keteıik, budan buryn áıelder arasynda Aýstralııa chempıonatynyń jeńimpazy anyqtalǵanyn jazǵan bolatynbyz.
