Tennıs: Qazaqstandyq Kolýmbııadaǵy týrnırdiń fınalyna shyqty
NUR-SULTAN. QazAqparat – Qazaqstandyq Grıgorıı Lomakın juptyq synda Kolýmbııadaǵy Pereıra chellendjer týrnıriniń fınalyna shyqty, dep habarlaıdy QazAqparat tilshisi.
Qazaqstan tennıs federatsııasy málim etkenindeı, G.Lomakın ýkraınalyq Oleg Prıhodkomen birge jartylaı fınalda osy jarystyń birinshi raketkalary, kolýmbııalyq Nıkolas Barrentos – meksıkalyq Mıgel Anhel Reıes Varelamen sheberlik baıqasty.
Qazaqstandyq-ýkraınalyq jup qarsylastaryn 6:3, 7:6 (7:3) esebimen utty.
Osylaısha G.Lomakın óz sporttyq jolynda ekinshi ret chellendjer týrnıriniń fınalyna shyqty.
Lomakın men Prıhodko sheshýshi básekede venesýelalyq Lýıs Martınes – kolýmbııalyq Krıstıan Rodrıgespen bas júlde úshin talasady.
Fınal elorda ýaqytymen saǵat 00.00-de bastalady.
Eske sala keteıik, budan buryn Aleksandr Nedovesovtiń Ispanııada «Úlken dýlyǵa» týrnıriniń úsh dúrkin chempıonyn utqanyn jazǵan bolatynbyz.
A.Nedovesov Marbelıa jarysynda pákstandyq Aısam Kýreshımen birge fınalǵa shyǵa almady. Olar jartylaı fınalda chehııalyq Roman Jebavy – aýstrııalyq Fılıpp Osvaldqa ese jiberdi – 4:6, 3:6.
Sondaı-aq taǵy bir qazaqstandyq Jibek Qulambaeva Polsha ókili Veronıka Falkovskamen birge Týnıstegi W15 dodasynda jartylaı fınalda frantsııalyqtar ıAsmın Mansýrı – Nına Radovanovıchten asa almady – 3:6, 6:7 (5:7).
