Tennıs: Qazaqstan men Chehııa Devıs kýbogi jarysynyń alǵashqy kúninde ázirge teń keledi
ASTANA. 5 naýryz. QazAqparat - Qazaqstan men Chehııa tennısshileri Ostrava qalasynda ótip jatqan Devıs Kýbogy (Álemdik top) birinshi raýndynyń alǵashqy kúninde 1:1 esebimen teń tarqasty.
Devıs Kýbogy matchynyń aıasynda birinshi bolyp qazaqstandyq Andreı Golýbev pen chehııalyq sportshy ıAn Gaıek saıysqa tústi. Tartysty ótken kezdesýde jerlesimiz qarsylasynan basym tústi. Byltyr Rotterdamda ATP týrnıri aıasynda bul sportshylardyń joly túıisken bolatyn. Qazaqstandyq ol kezde úsh settiń qorytyndysy boıynsha jeńiske jetken edi (7:6, 6:7, 6:2). Bul joly A. Golýbev 3,5 saǵatqa sozylǵan oıynda 7:6, 6:7, 1:6, 7:6, 6:3 esebimen úlken qıyndyqpen jeńiske jete aldy.
Sol kúni birinshi oıynnan keıin Qazaqstan men Chehııa komandalarynyń oıynshylary Mıhaıl Kýkýshkın jáne Tomash Berdyh sheberlik baıqasty. Bul joly chehııalyqtardyń mysy basym boldy. Degenmen álemdik reıtıngte 7-satyda turǵan ataqty tennısshi Tomash Berdyh birinshi sette M. Kýkýshkınge kútpegen jerden jol berip qoıa jazdady. 5:3 esebimen utylyp kele jatqan tusynda ol jınaqylyq tanytyp, qazaqstandyqty taı-brekte 6:7 esebimen tize búktirdi. Keıingi eki set 6:2, 6:3 esebimen T. Berdyhtyń basymdyǵymen aıaqtaldy.
25 jastaǵyT. Berdyh 2004 jyly Afıny Olımpıadasynda Rodjer Federerdiń ózin jarystan shyǵarǵany biraz jaıttyń betin ashyp tur. 2009 jyly Chehııa quramasymen «Devıs» kýbogynyń fınalyna shyqqany da bizdiń jigitter úshin oıǵa alarlyq aqparat. Ústimizdegi jyly aǵylshynnyń ashyq birinshiligi sanalatyn «Ýımbldon» men «Masters» týrnırleriniń aqtyq synyna shyqqan Tomash, sońǵy sátte ǵana súringen edi.
Osylaısha alǵashqy kúnniń qorytyndysy boıynsha ázirshe 1:1 teń esep tirkeldi. Devıs Kýbogynyń ekinshi oıyn kúninde, ıaǵnı búgin, 5 naýryzda juptyq jarys bolady. Qazaqstan namysyn ıÝrıı Şýkın men Evgenıı Korolev qorǵasa, Chehııa quramasynan Lýkash Dlýgı jáne Irjı Vesely jarysqa qatysady. Degenmen ol quram áli ózgertilýi de ǵajap emes.
Jarystyń sońǵy kúni - 6 naýryzda jeke oıyndarda Qazaqstan sportshysy Andreı Golýbev Chehııa quramasynyń eń úzdik oıynshysy Tomash Berdyhpen saıysqa túsedi. Al Qazaqstannyń ekinshi raketkasy Mıhaıl Kýkýshkın ıAn Gaıekke qarsy oınaıdy.
Devıs Kýbogy - bul erler ulttyq qurama komandalary arasyndaǵy eń iri jarys bolyp tabylatyn halyqaralyq tennıstik týrnır. Aǵymdaǵy týrnırdiń jeńimpazdary - Ispanııanyń quramasy. Joǵary deńgeıli bul dúbirli saıysqa qazaqstandyqtar alǵash ret qatysyp otyr.
