Tennıs: Qazaqstan quramasymen kezdesetin argentınalyq oıynshylar belgili boldy
NUR-SULTAN. QazAqparat – Bıllı Djın Kıng kýbogynyń pleı-off kezeńinde Qazaqstanmen kezdesetin Argentına quramasy belgili boldy, dep habarlaıdy QazAqparat tilshisi.
Qazaqstan tennıs federatsııasy málim etkenindeı, Argentına áıelder quramasynyń kapıtany Mersedes Pak myna oıynshylarǵa senim artyp otyr.
Dúnıejúzilik reıtıngte 46-orynda turǵan Nadıa Podoroska Argentınanyń basty úmiti bolmaq. Osy eldiń ekinshi raketkasy Paýla Ormaechea ázirge belgisiz sebeptermen komanda quramyna engen joq.
Tizimge sondaı-aq Vıktorııa Bozıo (442-raketka), Gılermına Naıa (558-raketka) jáne Marııa Lýrdes Karl (446-raketka) kirdi.
M.Pak Qazaqstan tennısshileriniń myqty, úsheýiniń alǵashqy júzdikke enetindigin, sondyqtan olardyń favorıt ekendigin, degenmen el namysy úshin baryn salatyndyqtaryn jetkizdi.
Eske sala keteıik, budan buryn Argentınamen oınaıtyn Qazaqstan áıelder quramasy anyqtalǵan bolatyn.
Argentına – Qazaqstan matchy Býenos-Aıresten 700 shaqyrym qashyqtyqta ornalasqan Kordova qalasynda 16-17 sáýir kúnderi ótedi.
Bastapqyda kezdesý 2020 jyly josparlanǵan bolatyn, alaıda koronavırýs indetine baılanysty bıylǵy aqpanǵa, sosyn sáýirge keıinge shegerildi.
Pleı-off básekesinde jekeleı synda tórt jekpe-jek bolady. Eger esep 2:2 bolǵan jaǵdaıda jeńimpaz máselesi juptyq kezdesýde sheshiledi.
Sonymen qatar Qazaqstan quramasynyń múshesi ıÝ.Pýtıntseva Charlston týrnıriniń úshinshi aınalymyna shyqty.
