Tennıs: Qazaqstan quramasy Ispanııadan jeńilip, Álem chempıonatynan shyǵyp qaldy
ASTANA. QazAqparat – Shotlandııanyń Glazgo qalasynda tennısten komandalyq álem chempıonaty – Bıllı Djın Kıng kýboginiń fınaldyq kezeńinde S tobynda Qazaqstan Ispanııaǵa jol berdi, dep habarlaıdy QazAqparat tilshisi.
Ekinshi básekede Qazaqstan men Ispanııanyń birinshi raketkalary Elena Rybakına men Paýla Badosa sheberlik baıqasty.
Qarsylastar osyǵan deıin tórt ret kezdesip, sonyń úsheýinde P.Badosa jeńiske jetken edi.
Bul joly birinshi partııada eki márte breık jasaǵan ıspanııalyq tennısshi basymdylyq tanytty – 6:2.
Ekinshi sette qazaqstandyq sportshy breıkpen ese qaıyrdy – 6:3.
Úshinshi, sheshýshi partııany Elena Rybakına breıkpen bastady – 2:0. Alaıda kóp uzamaı qarsylasynyń breık jasaýyna múmkindik beriip qoıdy. Aqyry P.Badosa kezdesýdi taǵy bir breıkpen túıindedi – 6:4.
Tartysty oıyn eki saǵattan astam ýaqytqa sozyldy.
Osylaısha, bes márte álem chempıony Ispanııa quramasy 2:0 esebimen alǵa shyǵyp, jeńisti qamtamasyz etti. Qalǵan juptyq báseke eshteńeni sheshpeıtin edi.
Eske sala keteıik, budan buryn tennısten álem chempıonatynda Qazaqstannyń Ispanııa quramasymen kortqa shyǵatynyn jazǵan bolatynbyz.
Sondaı-aq tennısten álem chempıonatynda Qazaqstanmen matchta Ispanııa alǵa shyqty.
