Tennıs: Qazaqstan quramasy Gonkongten 3:0 esebimen basym tústi
ASTANA.QazAqparat - Qazaqstan quramasy Úndistannyń Nıý-Delı qalasynda ótip jatqan tennısten Federatsııa Kýbogy Azııa/Muhıt elderi I tobynyń alǵashqy beldesýinde jeńiske jetti, dep habarlaıdy QazAqparat.
Federatsııa Kýbogy resmı saıtynyń aqparattaryna súıensek, Qazaqstan quramasy «A» tobynyń alǵashqy beldesýin Gonkongke qarsy ótkizdi.
Buǵan deıin habarlaǵanymyzdaı, jeke oıynda elimizdiń birinshi raketkasy, WTA reıtınginde 55-orynda turǵan Zarına Dııas, gonkongtik qarsylasy Ho-Chıng Výdy (1123) 6:3, 6:1 esebimen, al álemniń 81-raketkasy Pýtıntseva Kvan ıAý Ngty (966) 6:1, 6:0 esebimen esh qıyndyqsyz jeńdi.
Sońǵy juptyq beldesýde, Dııas/Pýtıntseva juby qarsylastary Chong E.Vong/Chjan Lın jubyn 6:1, 6:3 esebimen basym túsip, Qazaqstan quramasy 3:0 esebimen Gongokty jeńdi.
Aıta keterligi, Azııa jáne Okeanııa aımaǵynyń І toby ishindegi «A» tobynda Qazaqstan, Gonkong quramalarynan tys Qytaı jáne Úndistan komandalary baq synap jatyr. Alǵashqy kezdesýde Qytaı quramasy 2:1 esebimen Úndistandy qapy qaldyrdy.
Qazaqstan 8 aqpan kúni Úndistanmen, al 9 aqpan kúni Qytaı quramasymen jarys jolyna shyǵady.
Foto: prosports.kz
