Tennıs: Qazaqstan quramasy Devıs kýbogy matchyna daıyndyqty bastady
NUR-SULTAN. QazAqparat – Qazaqstan quramasy 4-5 naýryzda Osloda Devıs kýbogynyń Norvegııamen ótetin irikteý matchyna daıyndyqty bastady, dep habarlaıdy QazAqparat tilshisi.
Qazaqstan tennıs federatsııasy málim etkenindeı, qazaqstandyqtar Osloda jattyǵýǵa kiristi.
Budan buryn Norvegııa astanasyna Mıhaıl Kýkýshkın, Andreı Golýbev, Aleksandr Nedovesov jáne Dmıtrıı Popko kelse, búgin olardyń qataryna Qazaqstannyń birinshi raketkasy Aleksandr Býblık qosylady.
Qazaqstandyqtar Devıs kýbogy aıasynda norvegııalyqtarmen alǵash ret kezdesedi.
«Jaǵdaı men úshin birshama qalypty. Hard tósenishi eki komandaǵa da qolaıly. Ázirlik qyzý júrip jatyr. Bizdiń qurama Norvegııamen oıynǵa naǵyz babynda kirisedi dep oılaımyn», dedi Mıhaıl Kýkýshkın.
Matchta jeńip shyqqan komanda qyrkúıek aıynda ótetin Devıs kýbogynyń fınaldyq kezeńine (komandalyq álem chempıonatyna) joldama alady.
Eske sala keteıik, budan buryn Zańǵar Nurlanulynyń Frantsııadaǵy týrnırdiń chempıony atanǵanyn jazǵan bolatynbyz.
