Tennıs: Qazaqstan Devıs Kýbogynda Chehııany jeńgennen keıin álemdik reıtıngte 4 satyǵa kóterildi
ASTANA. 9 naýryz. QazAqparat /Jasulan Amanbaıuly/ - Tennısten Qazaqstan quramasy 4-6 naýryzda Devıs Kýbogynyń birinshi raýndynda Chehııa quramasynan basym túskennen keıin,
erler tennıs quramalarynyń reıtınginde 4 satyǵa joǵarylady.
Byltyr Qazaqstan erler quramasy Devıs Kýbogynyń irikteý kezeńi aıasynda Astanada Shveıtsarııa tennısshilerin 5:0 esebimen oısyrata jeńgennen soń, álemdik toptaǵy úzdik 16 elıtalyq komandalardyń qataryna qosylyp, fınaldyq kezeńde óner kórsetýge joldama alǵan bolatyn. Jerebe tartý kezinde Qazaqstan byltyrǵy jyldyń jartylaı fınalısi Chehııamen kezdesý ótkizetindigi belgili boldy. Jerlesterimiz 4-6 naýryzda, qarsylastardyń kortynda, Chehııanyń Ostrava qalasynda ótken kezdesýde 3:2 esebimen jeńiske jetti. Qazaqstan quramasyna 2 upaıdy elimizdiń 1-raketkasy Andreı Golýbev saldy. Ol chehııalyqtar ıAn Gaıek pen Tomash Berdyhtan aılasyn asyryp, kezdesý taǵdyryn 2:2 esebine jetkizdi. Al sońǵy kezdesýde Mıhaıl Kýkýshkın joǵaryda aty atalǵan ıAn Gaıekti utty.
Nátıjesinde Halyqaralyq tennıs federatsııasynyń (ITF) Devıs Kýbogy reıtıngisinde Qazaqstan 4 satyǵa kóterilip, 16-orynnan 12-orynǵa jaıǵasty. Tennısten Qazaqstannyń erler quramasy bunyń aldynda ózderinen birneshe saty joǵary turǵan, alaıda Devıs Kýboginiń álemdik toptaǵy alǵashqy matchtarynda jeńiliske ushyraǵan Úndistan, Chılı jáne Avstrııa quramalaryn basyp ozdy. Reıtıngtiń úzdik úshtigi ózgeriske ushyraǵan joq. Birinshi orynda burynǵysynsha Ispanııa tur. Ekinshi orynda Serbııa quramasy bolsa, úshinshi orynda qazaqstandyqtardan jeńilgenderine jeńilisterine qaramastan Chehııa tennısshileri keledi.
Postkeńestik elderdiń ishinde eń joǵary reıtıng (álemdik topta shvedtermen bolǵan kezdesýde jeńilis tapsa da) áli de bolsa Reseı quramasynda. Ol 7-orynda tur. Qazaqstan endigi kezdesýdi Argentına quramasymen ótkizedi. Kelesi kezeńge Argentına men Qazaqstan elderinen bólek, Serbııa, Shvetsııa, Germanııa, AQSh, Ispanııa jáne Frantsııa shyǵyp otyr.
Devıs Kýbogy - bul erler ulttyq qurama komandalary arasyndaǵy eń iri jarys bolyp tabylatyn halyqaralyq tennıstik týrnır. Aǵymdaǵy týrnırdiń jeńimpazdary - Ispanııanyń quramasy. Joǵary deńgeıli bul dúbirli saıysqa qazaqstandyqtar alǵash ret qatysyp otyr.
