Tennıs: Qazaqstan chempıonatynda 100-den astam sportshy baq synaıdy
NUR-SULTAN. QazAqparat – 13 qyrkúıekte elordadaǵy «Dáýlet» tennıs ortalyǵynda erler jáne áıelder arasynda Qazaqstan chempıonaty bastalady, dep habarlaıdy QazAqparat tilshisi.
Qazaqstan tennıs federatsııasy málim etkendeı, el birinshiligine 100-den astam sportshy qatysyp, baq synaıdy.
Chempıonattyń bıylǵy ereksheligi, onda elimizdiń mańdaıaldy tennısshileri óner kórsetedi. Atap aıtqanda, Dmıtrıı Popko, Tımofeı Skatov, Denıs Evseev, Beıbit Jýkaev, Grıgorıı Lomakın, Dostanbek Tashbolatov, Tımýr Habıbýllın, Gózal Aınıtdınova, Jibek Qulambaeva, Ekaterına Dmıtrıchenko, Sofıa Chýrsına, Tatıana Nıkolenko, Arýjan Saǵyndyqova jáne basqalar kortqa shyǵady.
Aıryqsha atap ótetin jaıt, erler jáne áıelder arasynda jekeleı syn jeńimpazdary Astana Open ATP 250 men WTA 250 týrnırlerine arnaıy shaqyrtý alyp, 7 myń AQSh dollary kóleminde grantqa qol jetkizedi. Fınalıster men qola júldegerler sáıkesinshe 5 myń jáne 3 myń AQSh dollaryna qosa Astana Open jarysynyń irikteý saıystaryna joldama alady.
Qazaqstan chempıonaty 17 qyrkúıekke deıin sozylady. Jarys kórermendersiz, barlyq sanıtarlyq-epıdemıologııalyq talaptardy saqtaı otyryp, ótkiziledi.
Eske sala keteıik, budan buryn US Open týrnırinde Andreı Golýbev pen ıAroslava Shvedovanyń sátti óner kórsetip jatqanyn, Grıgorıı Lomakınniń Ýkraınada ótken jarysta jeńimpaz atanǵanyn jazǵan bolatynbyz.
