Tennıs: Qazaqstan – Argentına matchynda esep teńesti
NUR-SULTAN. QazAqparat – Ispanııanyń Kordova qalasynda Bıllı Djın Kıng kýbogynyń pleı-off kezeńinde Qazaqstan – Argentına matchynyń ekinshi oıyny ótti, dep habarlaıdy QazAqparat tilshisi.
Kortqa bul joly Qazaqstannyń birinshi, álemniń 23-raketkasy Elena Rybakına argentınalyq, dúnıejúzilik reıtıngte nebári 430-orynda turǵan Marııa Lýrdes Karlemen shyqty.
Bul kezdesýde qazaqstandyq tennısshi sózsiz favorıt sanalǵanymen, oıyn basqasha órbidi.
Birinshi partııada aldymen E.Rybakına breıkpen alǵa shyqty – 2:0. Alaıda qarsylasy tarazy basyn teńestirip qana qoımaı, esep 3:3 bolǵan mezette breık jasap ketti. Sosyn basymdylyqty ýysynan shyǵarǵan joq – 6:4.
Ekinshi sette Elena qos breıkke qol jetkizip, esepti 4:0-ge jetkizdi. Budan keıin argentınalyq tennısshi qarymta qaıyryp, esepti qysqartty – 3:4. Degenmen Rybakına taǵy bir breıkten keıin setke dop bergende, óz múmkindigin paıdalana bildi – 6:3.
Úshinshi, sheshýshi partııada kort ıesi 3:0 esebimen alǵa ketti. Kún ystyq bolǵan soń ba, ózin jaısyz sezingen Rybakına medıtsınalyq kómekke de júgindi. Al argentınalyq sportshy qarqynyn báseńdetken joq – 6:0.
Báseke 2 saǵat 17 mınýtqa sozyldy.
Osylaısha Qazaqstan – Argentına matchynda esep teńesti – 1:1. Senbi kúni match jalǵasyp, Bıllı Djın Kıng kýbogynyń (burynǵy Federatsııa kýbogy) sheshýshi irikteý kezeńine beriletin joldama taǵdyry sheshiledi.
Eske sala keteıik, budan buryn Qazaqstan – Argentına matchynyń jerebesi tartylǵanyn, ıÝ.Pýtıntsevanyń jeńispen bastaǵanyn jazǵan bolatynbyz.
