TENNIS: Karolınanyń qaıta oralýy
ASTANA. QazAqparat - Tennısten AQSh-tyń ashyq chempıonatynda danııalyq (tegi polıak) Karolına Voznıatskıdiń qarqyny qatty.
Sporttyq ómirinde «Úlken dýlyǵany» utpasa da, bıyl 25-tiń bıigine shyǵatyn Karolına 2010 jáne 2011 jyldyń qorytyndysy boıynsha úzdik ónerimen kórinip, álemniń birinshi raketkasy atanǵan edi. Keıin biraq oıyny qojyrap, jeke ómirindegi ózgerister de áser etti me, áıteýir reıtıngisi túsip ketti. Bıyl Stambýl týrnırin utqan K.Voznıatskı AQSh chempıonatyna tastúıin daıyndyqpen kelgendeı. Sonyń dálelindeı jarys barysynda Reseıdiń basty úmiti, álemniń besinshi raketkasy Marııa Sharapovany joldan taıdyrdy. Al búgin tańda ıtalııalyq Sara Erranıdi (6:0, 6:1) buıym qurly kórmedi. Endi ol jartylaı fınalda bıylǵy chempıonattyń taǵy bir basty jańalyǵy, qytaı qyzy Pen Shýaımen kúsh synasady. Ony jeńse, fınal kútip tur. 2009 jyly osy AQSh birinshiliginiń fınalyna shyqqanmen, Karolına onda jeńilip qalǵan edi. Qaı tennısshiniń de armany - «úlken dýlyǵanyń» bireýin utý. Qalǵan jartylaı fınal ıeleri búgin ataǵynan at úrketin amerıkalyq, álemniń birinshi raketkasy Serena Ýılıams pen ıtalııalyq Flavııa Penneta, belorýs Vıktorııa Azarenko men bizdiń Zarına Dııasty utqan orys qyzy Ekaterına Makarovalardyń kezdesýlerinde anyqtalady.
Z.Dııas demekshi, AQSh chempıonatynyń úshinshi aınalymyna deıin jetken jıyrma jasar qazaq qyzy, Vesti.kz saıtynyń habarlaýynsha, aldaǵy aptada álemdegi úzdik qyryq tennısshiniń qataryna enedi. Aıta keteıik, ol juptyq synda da qytaılyq I Fan Sıýımen birge táp-táýir oıyn órnegin kórsetip, shırek fınalǵa deıin bardy.
