Tennıs: ıtalııalyq ıAnnık Sınner Ýımbldonda qatarynan ekinshi ret chempıon atandy
ASTANA. KAZINFORM – Italııalyq tennısshi ıAnnık Sınner Ýımbldon týrnırinde qatarynan ekinshi ret jeńimpaz atandy, dep habarlaıdy BBC.
Jeksenbi kúni, 12 shildede Londondaǵy Búkilanglııalyq kógaldaǵy tennıs jáne kroket klýbynyń korttarynda erler arasyndaǵy jekeleı syndaǵy fınaldyq kezdesý ótti. Chempıondyq ataq úshin álemniń birinshi raketkasy ıAnnık Sınner men Germanııa ókili Aleksandr Zverev baq synasty.
Match 3 saǵat 46 mınýtqa sozyldy. Osy ýaqyt ishinde Sınner 15 eıs jasap, eki ret qos qatelikke jol berdi jáne bes breık-poınttyń ekeýin sátti paıdalandy. Al Zverev 17 eıs oryndap, eki qos qatelik jiberdi.
Kezdesý 6:7 (7:9), 7:6 (7:2), 6:3, 6:4 esebimen Sınnerdiń paıdasyna aıaqtaldy. Osylaısha, ıtalııalyq tennısshi qarsylasymen bolǵan jeke kezdesýlerdegi esepti 11:4-ke jetkizdi. Ol Zverevti 2024 jyly Tsıntsınnatıdegi týrnırden beri qatarynan onynshy ret jeńip otyr.
24 jastaǵy ıAnnık Sınner álemdik reıtıngte birinshi orynda tur. Bul – onyń «Úlken dýlyǵa» týrnırlerindegi besinshi chempıondyq ataǵy. Buǵan deıin ol Aýstralııanyń ashyq chempıonatynda (2024, 2025), AQSh-tyń ashyq chempıonatynda (2024) jáne Ýımbldonda (2025, 2026) jeńiske jetken.
Sonymen qatar onyń enshisinde ATP týrnırlerindegi 29 chempıondyq ataq bar. Onyń ishinde Qorytyndy ATP týrnırindegi eki jeńisi (2024, 2025) de bar. Italııa quramasynyń sapynda Sınner Devıs kýbogyn eki ret (2023, 2024) jeńip alǵan.
29 jastaǵy Aleksandr Zverev qazir ATP reıtınginde úshinshi orynda tur. Alaıda Ýımbldon aıaqtalǵannan keıin ol ekinshi orynǵa kóteriledi.
Maýsym aıynda germanııalyq tennısshi mansabynda alǵash ret «Úlken dýlyǵa» týrnıriniń chempıony atanyp, «Rolan Garrosta» top jarǵan edi.
Onyń enshisinde ATP aıasyndaǵy jekeleı syndaǵy 25 chempıondyq ataq bar. Sonyń ishinde Qorytyndy ATP týrnırindegi eki jeńisi (2018, 2021) jáne 2021 jyly Tokıoda ótken Olımpıada oıyndarynyń altyn medali bar.
Aıta keteıik, Ýımbldon týrnırinde qarsylasyn oısyrata utqan Zańǵar Nurlanuly úshinshi aınalymǵa shyqqanyn jazdyq.
