Tennıs: Indıan-Ýells týrnırinde Z.Dııas atyshýly S.Ýılıamspen kezdese me?
ASTANA. QazAqparat - Búgin, 11 naýryz kúni AQSh-tyń Indıan-Ýells qalasynda tennısten áıelder arasynda halyqaralyq týrnır bastalady.
Chempıonat.kom saıtynan alynǵan málimetke qaraǵanda, onda álemdik reıtıngte kósh bastap kele jatqan amerıkandyq Serena Ýılıams, sondaı-aq reseılik Marııa Sharapova, rýmynııalyq Sımona Halep jáne basqa kúshtiler synǵa túsedi.
Álemniń 32-inshi, osy týrnırdiń 28-inshi raketkasy, qazaqstandyq Zarına Dııas ózge de tańdaýly oıynshylar qatarynda jarysty ekinshi aınalymnan bastaıdy. Onda horvatııalyq Donna Vekıch nemese amerıkandyq Lýıza Chırıkonyń bireýimen kezdesedi. Bul ekeýi de - on segiz jastaǵy jas oıynshylar. Eger Zarına úshinshi aınalymǵa ótse, onda atyshýly S.Ýılıamstyń ózimen sheberlik baıqasýy ábden yqtımal.
Ótken aptada Elbasy Nursultan Nazarbaevpen júzdesken Z.Dııas álemniń úzdik on tennısshisi qataryna enýdi maqsat etip otyrǵanyn jetkizgen bolatyn. Zarınanyń shama-sharqyn synaıtyn týrnırdiń biri dál osy jarys bolmaq.
Aıta keteıik, 22 naýryzda márege jetetin Indıan-Ýells týrnıriniń júlde qory 5,4 mln. AQSh dollaryna jýyqtaıdy. Sondyqtan onda sátti óner kórsetkender upaı qoryn tolyqtyryp, tabys ta tabatyny anyq.
