Tennıs: Indıan-Ýells týrnırinde Pýtıntseva men Rybakına ózara kezdesedi
NUR-SULTAN. QazAqparat – Qazaqstandyq, álemniń 43-raketkasy ıÝlııa Pýtıntseva Indıan-Ýells (AQSh) WTA 1000 týrnıriniń ekinshi aınalymyna shyqty, dep habarlaıdy QazAqparat tilshisi.
ıÝ.Pýtıntseva alǵashqy aınalymda reıtıngte 74-oryndaǵy germanııalyq Andrea Petkovıchpen kortqa shyqty.
Buǵan deıin ekeýiniń ózara bes ret joldary toqaılassa, sonyń úsheýinde qazaqstandyq tennısshi jeńiske jetken eken.
Bul joly birinshi partııada qarsylastar úsh retten breık jasady. Taı-breıkte Pýtıntsevanyń asyǵy alshysynan tústi – 7:6 (7:2).
Ekinshi sette ıÝlııa 3:0 esebimen alǵa ketti. Taǵy bir breık – 5:1. Aqyry matchqa dop bergende, óz múmkindigin múlt jibergen joq – 6:1.
Saǵat jarymnan astam ýaqytqa sozylǵan báseke barysynda qazaqstandyq sportshy bes breık-poıntty túgeldeı paıdalana bildi. Qarsylasy 1 eıs, 3 breıkpen (5 breık-poınt) shekteldi.
ıÝ.Pýtıntseva ekinshi aınalymda Qazaqstannyń birinshi, álemniń 16-raketkasy Elena Rybakınamen ózara kezdesedi. Osy jarystyń 13-raketkasy bolyp tirkelgen E.Rybakına týrnırdi birden ekinshi aınalymnan bastaıdy.
Eske sala keteıik, budan buryn Zarına Dııastyń Indıan-Ýellste negizgi týrnırge joldama alǵanyn jazǵan bolatynbyz.
Álemniń 108-raketkasy Z.Dııas birinshi aınalymda reıtıngte 121-satydaǵy japonııalyq Nao Hıbınomen sheberlik baıqasady. Osyǵan deıin ózara tórt kezdesip, sonyń bireýinde ǵana Zarına basym túsken.
