Tennıs: Golýbev juptyq synda Doha týrnıriniń fınalyna óte almady
NUR-SULTAN. QazAqparat – Qazaqstandyq Andreı Golýbev juptyq synda Doha ATP 250 týrnıriniń fınalyna óte almady, dep habarlaıdy QazAqparat tilshisi.
Qazaqstandyq tennısshi frantsııalyq Fabrıs Martenmen birge jartylaı fınalda osy dodanyń 3-raketkalary, nıderlandylyq Ýes Kolhof – ulybrıtanııalyq Nıl Skýpskımen sheberlik baıqasty.
Birinshi partııada nıderlandylyq-ulybrıtanııalyq jup basymdylyq tanytty – 6:4.
Ekinshi sette A.Golýbev pen F.Marten 2:0 esebimen alǵa shyqqanymen, sol múmkindikterin paıdalana almady. Aqyry taı-breıkte Ý.Kolhof pen N.Skýpskıdiń asyǵy alshysynan tústi – 7:6 (7:3).
Bir saǵat 45 mınýtqa sozylǵan tartysty báseke barysynda qazaqstandyq-frantsııalyq jup 3 eıs jasap, 8 breık-poınttyń bireýin ǵana paıdalana aldy. Qarsylastary 3 eıs, 2 breıkke (13 breık-poınt) qol jetkizdi.
Osylaısha A.Golýbev juptyq synda júlde qory 1 mln AQSh dollarynan asatyn jarystyń fınalyna shyǵa almaı qaldy.
Eske sala keteıik, budan buryn A.Golýbevtiń juptyq synda Doha týrnıriniń jartylaı fınalyna shyqqanyn jazǵan bolatynbyz.
