Tennıs: Golýbev pen Nedovesov Ystanbuldaǵy týrnırde jeńimpaz atandy

NUR-SULTAN. QazAqparat – Qazaqstandyqtar Andreı Golýbev pen Aleksandr Nedovesov juptyq synda Ystanbul chellendjer týrnıriniń jeńimpazy atandy, dep habarlaıdy QazAqparat tilshisi.

Qazaqstandyq jup fınalda chehııalyqtar Lýkash Rosol men Marek Gengelmen kezdesýi kerek edi.

Machtqa qarsylastary kelmegendikten, A.Golýbev pen A.Nedovesovke chempıondyq ataq oınamaı-aq buıyrdy.

Osy dodada munyń aldynda qazaqstandyqtar úsh básekede jeńiske jetken bolatyn. Sonyń ishinde shırek fınalda osy jarystyń 2-raketkasy bolyp tirkelgen aýstralııalyq Ramız Djýneıd pen úndistandyq Pýrav Radja jubyn tize búktirdi.

Osylaısha Golýbev pen Nedovesov juptyq synda kezekti tabystaryna qol jetkizdi.

Eske sala keteıik, budan buryn Zarına Dııastyń Osaka týrnıriniń irikteý saıysyn sátti bastaǵanyn, al Elena Rybakınanyń Nanchan týrnıriniń fınalyna shyqqanyn jazǵan bolatynbyz.