Tennıs: Golýbev Italııadaǵy týrnırdiń jartylaı fınalyna shyqty
NUR-SULTAN. QazAqparat – Qazaqstandyq Andreı Golýbev juptyq synda Kordenons (Italııa) chellendjer týrnıriniń jartylaı fınalyna shyqty, dep habarlaıdy QazAqparat tilshisi.
A.Golýbev ýrýgvaılyq Arıel Beharmen birge shırek fınalda ıtalııalyqtar Matteo Marfıa men Danıelo Valentınomen sheberlik baıqasty.
Qazaqstandyq-ýrýgvaılyq jup 50 mınýtqa sozylǵan matchta 6:2, 6:1 esebimen jeńiske jetti.
A.Golýbev pen A.Behar fınalǵa shyǵý úshin frantsııalyqtar Bendjamın Bonzı men Antýan Oan jáne shveıtsarııalyq Lýka Margaollı men ıtalııalyq Andrea Vavassorı juptarynyń qaı jeńgenimen talasady.
Taǵy bir qazaqstandyq, álemniń 165-raketkasy Dmıtrıı Popko Ostrava (Chehııa) chellendjer týrnıriniń shırek fınalyna shyǵa almady. Ol ekinshi aınalymda reıtıngte 225-orynda turǵan chehııalyq Zdenek Kolarǵa 7:5, 4:6, 5:7 esebimen ese jiberdi. Bul tartysty báseke 3 saǵattan astam ýaqytqa sozyldy.
Eske sala keteıik, budan buryn M.Kýkýshkınniń US Open týrnıriniń úshinshi aınalymyna shyqqanyn, al E.Rybakınanyń jeńilis tapqanyn jazǵan bolatynbyz.
