Tennıs: Federer Djokovıchke ese jiberdi
ASTANA. QazAqparat - Búgin Avstralııa ashyq chempıonatynyń jartylaı fınalynda Rodjer Federer men Novak Djokovıch baq synasty.
Óte joǵary deńgeıde oınaıtyn eki qarsylas arasyndaǵy dál búginge deıingi esep 22-22 bolǵan edi. Osy kezdesýden keıin álemniń birinshi raketkasy Novak Djokovıch ataqty Federerden 6-1, 6-2, 3-6, 6-3 esebimen 23-shi ret basym tústi. Eki tennısshi arasyndaǵy 45-shi kezdesýdiń alǵashqy 2 setinde shveıtsarııalyq maestronyń oıyny tipti júrmedi.
Artynsha Djokovıchtiń qarqyny tym joǵary bolsa kerek. Úshinshi sette ǵana Rodjer óziniń ońaı jeńile qoımatynyn taǵy bir márte dáleldep, sol setti óz paıdasyna sheshti. Biraq qansha kúsh salsa da, serbııalyq tennısshi óziniń Úlken shlem týrnırindegi qatarynan 20-shy jeńisine qol jetkizip otyr.
Ol ótken jyly Frantsııa ashyq chempıonatynyń fınalynda Stanıslas Vavrınkaǵa ǵana ese jibergen edi. Osy kúnge deıin tennıs tarıhynda Avstralııa chempıonatynyń fınaldyq básekesine eshkim 6 ret shyqpaǵan.
Sóıtip, serbııalyq dańqty tennısshi atalǵan chempıonattyń fınalyna shyǵyp otyr. Al onyń qarsylysy erteń anyqtalady. Erteń Melbýrn qalasynyń tennıs ortalyǵynda kanadalyq Mılosh Raonıch pen ulybrıtanııalyq Endı Marreı kezdesedi. Bul kezdesý Astana ýaqytymen saǵat 14-30-da bastalady.
Bir aıta keterlik jaıt, Endı Avstralııa chempıonatynyń aqtyq synyna 4 ret shyǵyp, biraq birde-bir ret jeńiske jete almaǵan edi. Ótken jyly fınalda Novak dál sol Marreıdi jeńgen bolatyn.
