Tennıs: Evseev pen Popko Almaty týrnıriniń ekinshi aınalymyna shyqty
NUR-SULTAN. QazAqparat – Qazaqstandyqtar Denıs Evseev pen Dmıtrıı Popko Almaty chellendjer týrnıriniń ekinshi aınalymyna shyqty, dep habarlaıdy QazAqparat tilshisi.
Dúnıejúzilik reıtıngte 385-orynda turǵan Denıs Evseev bastapqy kezdesýin álemniń 292-raketkasy, ıtalııalyq Rıkkardo Bonadıomen ótkizdi.
Qazaqstandyq tennısshi 2 saǵat 14 mınýtqa sozylǵan matchta 6:4, 4:6, 7:5 esebimen jeńiske jetti. D.Evseev jeti eıs jasap, bes breıkke qol jetkizdi. Qarsylasy tórt breık, úsh eıspen shekteldi.
D.Evseev shırek fınalǵa shyǵý úshin taǵy bir qazaqstandyq Tımofeı Skatovpen talasady.
Álemniń 195-inshi, osy dodanyń 6-raketkasy Dmıtrıı Popko reıtıngte 374-satydaǵy ýkraınalyq Vladıslav Orlovty 6:2, 6:3 esebimen utty.
D.Popko ekinshi aınalymda álemniń 338-raketkasy, rýmynııalyq Fılıp Krıstıan Jııaný nemese reıtıngte 257-satydaǵy reseılik Teımýraz Gabashvılıdiń bireýimen sheberlik baıqasady.
Taǵy bir qazaqstandyq Beıbit Jýkaev Almaty týrnıriniń 1-raketkasy, slovakııalyq Andreı Martınge 2:6, 1:6 esebimen jol berdi.
Eske sala keteıik, budan buryn Tımofeı Skatovtyń Almaty jarysyn jeńispen bastaǵanyn, Elena Rybakınanyń juptyq synda da Rolan Garros týrnıriniń shırek fınalyna shyqqanyn jazǵan bolatynbyz.
Sondaı-aq A.Býblık pen A.Golýbev Rolan Garros dodasynyń jartylaı fınalyna shyqty.
