Tennıs: Elena Rybakına jaraqatyna baılanysty Sıdneı jarysyn jalǵastyra almady
NUR-SULTAN. QazAqparat – Qazaqstannyń birinshi, álemniń 13-raketkasy Elena Rybakına jaraqatyna baılanysty Sıdneı WTA 500 týrnırin jalǵastyra almady, dep habarlaıdy QazAqparat tilshisi.
Qazaqstan tennıs federatsııasy málim etkenindeı, E.Rybakına ekinshi aınalymda frantsııalyq Karolın Garsııamen kezdesýi tıis bolatyn.
Ol ótken aptada Adelaıda jarysynyń fınalyna deıin jetip, tek álemniń birinshi raketkasy, aýstralııalyq Eshlı Bartıge jol bergen edi.
«Ótken aptadaǵy matchtyń kóptiginen jáne Sıdneıge kelip, keshegi básekeni ótkizgennen keıin aǵzam tolyqtaı qalpyna kelmeı, jambasymda aýyrsyný paıda boldy. Jankúıerlerime aıtarym, ýaıymdamańyzdar, Aýstralııa ashyq chempıonatyna deıin babyma kelip, onda mindetti túrde óner kórsetemin», dedi Elena Rybakına.
Eske sala keteıik, budan buryn Elena Rybakınanyń Sıdneıde US Open chempıonyn utqanyn, qazaqstandyq úsh tennısshiniń Aýstralııa ashyq chempıonaty irikteý saıystarynyń fınalyna shyqqanyn jazǵan bolatynbyz.
