Tennıs: Elena Rybakına Ystanbul týrnıriniń shırek fınalyna shyqty
NUR-SULTAN. QazAqparat - Qazaqstandyq tennısshi Elena Rybakına Ystanbul týrnıriniń shırek fınalyna shyqty, dep habarlaıdy QazAqparat tilshisi.
Іrikteý saıystarynan keıin negizgi jarysqa joldama alǵan E.Rybakına ekinshi aınalymda álemniń 52-raketkasy, frantsııalyq Polın Parmantemen kúsh synasty.
Álemdik reıtıngte 161-orynda turǵan qazaqstandyq tennısshi 1999 jylǵy bolsa, qarsylasy odan baqandaı 13 jasqa úlken, tájirıbesi de mol edi.
Birinshi partııany qarqyndy bastaǵan Rybakına Parmantege birde-bir geım bermeı, qaqyrata jeńdi - 6:0.
Esesine ekinshi setti frantsııalyq tennısshi breıkpen bastady - 2:0. Degenmen esep 3:4 bolǵan mezette Elena qaıyra breık jasady - 4:4. Sodan keıin matchty taǵy bir breıkpen túıindedi - 6:4.
Qazaqstandyq tennısshiniń basymdylyǵymen ótken báseke bir saǵatqa jýyq ýaqytqa sozyldy.
Elena Rybakına júlde qory 250 myń AQSh dollaryna baǵalanǵan Ystanbul týrnıriniń shırek fınalynda taǵy bir tájirıbeli tennısshi, álemniń 47-raketkasy, 33 jasar chehııalyq Barbora Strytsovamen sheberlik baıqasady.
Osy týrnırdiń juptyq synynda 4-raketka bolyp tirkelgen qazaqstandyq Galına Voskoboeva men reseılik Veronıka Kýdermetova chehııalyqtar Barbora Strytsova men Marketa Vondrýsovaǵa 3:6, 1:6 esebimen ese jiberip, shırek fınalǵa shyǵa almady. Endi jekeleı synda E.Rybakına osy B.Strytsovamen kezdeskeli otyr.
Eske sala keteıik, budan buryn E.Rybakınanynń Ystanbuldyń negizgi týrnırine joldama alǵanyn, sodan keıin ekinshi aınalymǵa shyqqanyn jazǵan bolatynbyz.
