Tennıs: Elena Rybakına Ýımbldon týrnıriniń tórtinshi aınalymyna shyqty
NUR-SULTAN. QazAqparat – Qazaqstannyń birinshi, álemniń 20-raketkasy Elena Rybakına Ýımbldon týrnıriniń tórtinshi aınalymyna shyqty, dep habarlaıdy QazAqparat tilshisi.
«Úlken dýlyǵa» jarysynyń 18-raketkasy bolyp tirkelgen, ótken aıda 22-ge tolǵan qazaqstandyq tennısshi úshinshi aınalymda álemniń 46-raketkasy, amerıkalyq, 28 jastaǵy Shelbı Rodjerspen sheberlik baıqasty.
Buǵan deıin qarsylastar eki márte kezdesip, bir-birden jeńiske jetken edi. Ótken jyly US Open dodasynda Sh.Rodjers 7:5, 6:1 esebimen utsa, eki apta buryn E.Rybakına Berlınde ese qaıyrǵan edi – 2:6, 6:3, 6:4.
Ýımbldonda úshinshi aınalymda amerıkalyq sportshy kútpegen jerden álemniń 18-inshi, osy týrnırdiń 15-raketkasy, grekııalyq Marııa Sakkarıdi 7:5, 6:4 esebimen utyp ketken edi.
Birinshi partııada qos breık jasaǵan Elena qarsylasyn qınalmaı jeńdi – 6:1.
Ekinshi sette esep 2:2 bolǵan mezette Rybakına breık jasap, óz geımin de ala bildi – 4:2. Sodan keıin matchty eıspen bitirdi – 6:4.
Bir saǵat 6 mınýtqa sozylǵan báseke barysynda Rybakına 8, qarsylasy bir ǵana eıs jasaı aldy. Qazaqstandyq tennısshi 8 breık-poınttyń úsheýin paıdalandy.
Osylaısha E.Rybakına Ýımbldon dodasynda alǵash ret óner kórsetkenine qaramastan, tórtinshi aınalymyna shyǵyp otyr.
Qazaqstandyq tennısshi shırek fınalǵa shyǵý úshin álemniń tórtinshi, osy jarystyń 2-raketkasy, Belarýs ókili Arına Sobolenkomen talasady. Ol dúnıejúzilik reıtıngte 94-satyda turǵan kolýmbııalyq Marııa-Kamıla Osorıo Serranony 6:0, 6:3 esebimen tize búktirdi.
Eske sala keteıik, budan buryn Zarına Dııastyń juptyq synda Ýımbldon týrnırin sátti bastaǵanyn, Aleksandr Býblıktiń álemniń 21-raketkasyn utyp, úshinshi aınalymǵa ótkenin jazǵan bolatynbyz.
Sondaı-aq Andreı Golýbev juptyq synda ekinshi aınalymǵa shyqty.
Qazaqstannyń jas juldyzy Zańǵar Nurlanuly jasóspirimder arasynda Berlın týrnıriniń fınalyna shyqty.
