Tennıs: Elena Rybakına Ýımbldon týrnırin jeńispen bastady
NUR-SULTAN. QazAqparat – Qazaqstannyń birinshi, álemniń 20-raketkasy Elena Rybakına Ýımbldon týrnırin jeńispen bastady, dep habarlaıdy QazAqparat tilshisi.
Osy «Úlken dýlyǵa» týrnıriniń 18-raketkasy bolyp tirkelgen E.Rybakına alǵashqy aınalymda dúnıejúzilik reıtıngide 59-orynda turǵan frantsııalyq Krıstına Mladenovıchpen kezdesti.
Buǵan deıin qazaqstandyq tennısshi 2019 jyly Ýımbldon jarysynyń irikteý saıystarynan asa almaǵan bolatyn. Al ótken jyly pandemııaǵa baılanysty aıtýly doda ótken joq.
Birinshi partııada esep 2:1 bolǵan mezette E.Rybakına breık jasaı bildi. Osy basymdylyǵynan set bitkenshe aıyrylǵan joq – 6:4.
Ekinshi sette qazaqstandyq sportshy qos birdeı breıkpen alǵa ketti – 3:0. Budan keıin K.Mladenovıch medıtsınalyq kómekke júgindi. Elena bul partııada qarsylasyna birde-bir geım bergen joq – 6:0. Ol match barysynda 7 eıs jasap, 10 breık-poınttyń tórteýin paıdalandy.
Báseke 1 saǵatqa jýyq ýaqytqa sozyldy.
Osylaısha Londondaǵy «Úlken dýlyǵa» dodasy qazaqstandyq tennısshiler úshin sátti bastaldy.
E.Rybakına ekinshi aınalymda álemniń 83-raketkasy, japonııalyq Mısakı Doı nemese reıtıngide 120-satydaǵy amerıkalyq Kler Lıýdiń bireýimen sheberlik baıqasady.
Áıelder arasynda Ýımbldondaǵy fınaldyq match 10 shildege belgilengen. Jarystyń 2019 jylǵy chempıony, rýmynııalyq Sımona Halep jaraqatyna baılanysty bıyl qatysqan joq.
Eske sala keteıik, budan buryn Elena Rybakınanyń álemdegi úzdik jıyrma tennısshiniń qataryna qaıta engenin, Londonda Ýımbldon týrnıri bastalatynyn jazǵan bolatynbyz.
