Tennıs: Elena Rybakına Sankt-Peterbýrg týrnıriniń jartylaı fınalyna shyqty
NUR-SULTAN. QazAqparat – Qazaqstannyń birinshi, álemniń 25-raketkasy Elena Rybakına Sankt-Peterbýrg WTA týrnıriniń jartylaı fınalyna shyqty, dep habarlaıdy QazAqparat tilshisi.
Osy jarystyń 8-raketkasy bolyp tirkelgen E.Rybakına shırek fınalda dúnıejúzilik reıtıngte 159-orynda turǵan frantsııalyq Osean Dodenmen kezdesti.
O.Doden negizgi týrnırge irikteý saıystarynan keıin qosylǵan-dy.
Birinshi partııada qazaqstandyq tennısshi 5:2 esebimen alǵa shyqty. Budan keıin onyń setti bitiretindeı múmkindigi bolǵanymen, ony paıdalana almaı, qarsylasynyń breık jasap, tarazy basyn teńestirýine múmkindik berip qoıdy. E.Rybakına partııa barysynda tórt birdeı seıt-bolyn múlt jiberse, O.Doden taı-breıkte birden júzege asyrdy – 7:6 (7:5).
Ekinshi sette O.Doden breıkpen alǵa ketti – 3:1. Degenmen E.Rybakına da qaıyra breık jasaı bilip, óz geımin aldy – 3:3. Esep 5:4 bolyp, Rybakına dop bergende, frantsııalyq tennısshi qos birdeı matchbolyn paıdalana almady. Sodan soń qazaqstandyq sportshy breıkpen alǵa shyǵyp, bul joly setti jeńispen támamdady – 7:5.
Úshinshi, sheshýshi partııany Elena breıkpen bastady – 1:0. Taǵy bir breık – 3:0. Sodan keıin qarsylasynyń qaıyra breık jasaýyna múmkindik bermeı, esepti 5:1-ge jetkizdi. Aqyry matchqa dop bergende, qatelesken joq – 6:2.
Eki saǵat 26 mınýtqa sozylǵan tartysty básekede qazaqstandyq tennısshi 15 eıs jasady.
E.Rybakına júlde qory 848 myń AQSh dollaryna baǵalanǵan jarystyń fınalyna shyǵý úshin álemniń 5-inshi, osy dodanyń 1-raketkasy, shveıtsarııalyq Belında Benchıch nemese reıtıngte 21-satyda turǵan grekııalyq Marııa Sakkarıdiń bireýimen talasady.
E.Rybakına Sankt-Peterbýrg týrnıriniń alǵash ret jartylaı fınalyna shyqty. Ol 2018 jyly 18 jasynda shırek fınalǵa deıin jetken bolatyn.
Eske sala keteıik, budan buryn Aleksandr Býblıktiń Rotterdam týrnıriniń shırek fınalyna shyǵa almaǵanyn, Qazaqstan áıelder quramasyna ıAroslava Shvedovanyń basshylyq etetinin jazǵan bolatynbyz.
