Tennıs: Elena Rybakına Rolan Garros týrnırinde utylyp qaldy
NUR-SULTAN. QazAqparat Qazaqstannyń birinshi, álemniń 18-raketkasy Elena Rybakına Rolan Garros týrnıriniń úshinshi aınalymyna óte almady, dep habarlaıdy QazAqparat tilshisi.
Frantsııa ashyq chempıonatynyń 14-raketkasy bolyp tirkelgen qazaqstandyq tennısshi ekinshi aınalymda reıtıngte 49-orynda turǵan kort ıesi Fıona Ferromen oınaıdy.
E.Rybakına bıyl 21-ge tolsa, qarsylasy odan eki jasqa úlken edi.
Frantsııalyq tennısshi koronavırýsqa baılanysty oryn alǵan úzilisten keıin birde-bir kezdesýinde jeńilip kórgen joq-ty. Sonyń ishinde tamyzdaǵy Palermo WTA týrnırinde jeńimpaz atandy.
Birinshi partııada qazaqstandyq sportshy breıkpen alǵa shyqty – 2:0. Áıtse de F.Ferro qatarynan tórt geımge qol jetkizdi – 4:2. Sosyn taǵy bir breıkpen bitirdi – 6:3.
Ekinshi sette esep 2:2 bolǵan mezette E.Rybakına breık jasaǵanymen, qarsylasy sol boıda tarazy basyn teńestirdi – 3:3. Degenmen Elena qaıta breıkpen birge óz geımin alyp, esepti 5:3-ke jetkizdi. Aqyry ózi dop bergende, alǵashqy setpoıntyn paıdalana bildi – 6:4.
Úshinshi, sheshýshi partııa basynda áýeli qazaqstandyq, sosyn frantsııalyq tennısshi eki retten breık jasady – 2:2. Budan keıin E.Rybakınanyń jıi qateleskenin paıdalanǵan F.Ferro esepti 6:2-ge jetkizdi.
Tartysty báseke 2 saǵat 2 mınýtqa sozyldy.
F.Ferro úshinshi aınalymda reıtıngte 58-satydaǵy rýmynııalyq Patrıtsııa Marııa Tıgpen sheberlik baıqasady.
Ol ekinshi aınalymda amerıkalyq Krıstına Makheıldi 6:4, 6:3 esebimen joldan taıdyrdy.
Osylaısha Rolan Garros jarysynda Qazaqstannan eshkim qalmady.
Eske sala keteıik, budan buryn A.Býblıktiń Rolan Garros týrnırinde utylyp qalǵanyn jazǵan bolatynbyz.
