Tennıs: Elena Rybakına Maıamı týrnıriniń úshinshi aınalymyna shyqty
NUR-SULTAN. QazAqparat – Qazaqstannyń birinshi, álemniń 18-raketkasy Elena Rybakına Maıamı WTA 1000 týrnıriniń úshinshi aınalymyna shyqty, dep habarlaıdy QazAqparat tilshisi.
Júlde qory 8,3 mln AQSh dollarynan asatyn iri jarystyń 17-raketkasy bolyp tirkelgen qazaqstandyq tennısshi dodany ekinshi aınalymnan bastady.
E.Rybakınaǵa álemniń 57-raketkasy, rýmynııalyq Elena Gabrıela Rýze qarsy turdy.
Qos tennısshiniń bul ózara alǵashqy kezdesýi edi.
Birinshi partııada qazaqstandyq sportshy basymdylyq tanytty – 6:4.
Ekinshi sette rýmynııalyq sportshy taǵy bir breık jasaǵanymen, E.Rybakına tarazy basyn qaıta teńestirdi. Aqyry matchty taǵy bir breıkpen támam qyldy – 7:5.
Qazaqstandyq tennısshi 1 saǵat 45 mınýtqa sozylǵan báseke barysynda 7 eıs jasap, 10 breık-poınttyń altaýyn múlt jibermedi. Qarsylasy 2 eıs, 4 breıkten (7 breık-poınt) asa almady.
Elena Rybakına úshinshi aınalymda qos amerıkalyq, álemniń 21-raketkasy Djessıka Pegýla nemese reıtıngte 38-orynda turǵan 2017 jylǵy US Open týrnıriniń jeńimpazy Sloan Stıvenstiń bireýimen sheberlik baıqasady.
Ótken jyly osy dodada E.Rybakına úshinshi aınalymǵa
deıin jetken edi.
Eske sala keteıik, budan buryn Maıamı týrnırinde Mıhaıl Kýkýshkınniń ekinshi aınalymǵa ótkenin, Devıs kýbogynda Qazaqstannyń úshinshi sebetke túskenin jazǵan bolatynbyz.
