Tennıs: Elena Rybakına Istbýrn týrnıriniń jartylaı fınalyna shyqty
NUR-SULTAN. QazAqparat – Qazaqstannyń birinshi, álemniń 21-raketkasy Elena Rybakına Istbýrn (Ulybrıtanııa) WTA 500 týrnıriniń jartylaı fınalyna shyqty, dep habarlaıdy QazAqparat tilshisi.
E.Rybakına shırek fınalda dúnıejúzilik reıtıngte 61-orynda turǵan latvııalyq Anastasııa Sevastovamen kezdesti.
Birinshi partııada qos breıkke qol jetkizgen latvııalyq tennısshi basymdylyq tanytty – 6:2.
Ekinshi sette esep 3:2 bolǵan mezette E.Rybakına breık jasap ketti. Biraq qarsylasy ile-shala jaýap qaıyrdy – 4:4. Sodan keıin taǵy bir breık jasap, alǵa shyqty – 6:5. A.Sevastova matchqa dop bergende, qazaqstandyq tennısshi tarazy basyn qaıta teńestirdi – 6:6. Taı-breıkte Elena Anastasııanyń eki matchbolynan sytylyp, shyǵa bildi – 7:6 (9:7).
Úshinshi, sheshýshi partııada esep 5:5 bolǵanda, Rybakına breık jasaı aldy – 6:5. Alaıda qarsylasy da qalyspady – 6:6. Aqyry taı-breıkte Elena jeńisti julyp aldy – 7:6 (7:5).
Asa tartysty ótken báseke 2 saǵat 31 mınýtqa sozyldy.
E.Rybakına júlde qory 565 myń AQSh dollarynan asatyn jarystyń fınalyna shyǵý úshin taǵy bir latvııalyq, álemniń 43-raketkasy Elena Ostapenkomen talasady. Ol shırek fınalda reseılik, álemniń 34-raketkasy Darıa Kasatkınany 1:6, 7:5, 6:2 esebimen tize búktirdi.
Eń bastysy, osy dodadan keıin bastalatyn Ýımbldon týrnırinde tabysty óner kórsetý qajet-aq. Bul «Úlken dýlyǵa» jarysynda E.Rybakına 19-raketka bolyp tirkelip otyr.
Eske sala keteıik, budan buryn E.Rybakınanyń Istbýrnda álemniń besinshi raketkasyn utqanyn, A.Býblıktiń jartylaı fınalǵa óte almaǵanyn jazǵan bolatynbyz.
