Tennıs: Elena Rybakına Hobart týrnıriniń jartylaı fınalyna shyqty
NUR-SULTAN. QazAqparat – Qazaqstannyń birinshi, álemniń 30-raketkasy Elena Rybakına Hobart (Aýstralııa) WTA týrnıriniń jartylaı fınalyna shyqty, dep habarlaıdy QazAqparat tilshisi.
Osy jarystyń (júlde qory – 275 myń AQSh dollary) 3-raketkasy bolyp tirkelgen qazaqstandyq tennısshi shırek fınalda reıtıngte 129-orynda turǵan aýstralııalyq Lızett Kabreramen kezdesti.
Birinshi partııada birden breık jasaǵan E.Rybakına 2:0 esebimen alǵa shyqty. Degenmen L.Kabrera da qalyspaı, tarazy basyn teńestirdi – 4:4. Aqyry ol taı-breıkte sátti óner kórsetti – 7:6 (7:4).
Ekinshi sette de qazaqstandyq tennısshi breıkpen alǵa ketti – 3:0. Biraq qarsylasy esepti taǵy teńestirdi – 4:4. Bul joly taı-breıkte E.Rybakına basym boldy – 7:6 (7:2).
Úshinshi, sheshýshi partııa breık almasýmen bastalyp, sosyn qazaqstandyq tennısshi 3:1 esebimen alǵa shyqqanymen, basymdylyqty saqtaı almady. Degenmen esep 5:5 bolǵanda, taǵy bir breık jasaı bildi – 6:5. Sodan keıin matchqa dop bergende, esesin jibergen joq – 7:5.
Birshama shıelenispen ótken báseke 2 saǵat 39 mınýtqa sozyldy.
E.Rybakına fınalǵa shyǵý úshin álemniń 101-raketkasy, ulybrıtanııalyq Hıter Ýotsonmen talasady. Ol shırek fınalda 3 saǵat 33 mınýtqa sozylǵan asa tartysty machtta álemniń 17-inshi, osy dodanyń 1-raketkasy, belgııalyq Elıza Mertensti 6:7 (5:7), 6:4, 7:5 esebimen jeńip ketti.
Eske sala keteıik, budan buryn Elena Rybakınanyń Hobart týrnıriniń shırek fınalyna shyqqanyn, Dmıtrıı Popkonyń Aýstralııa ashyq chempıonatynyń irikteý saıysyn sátti bastaǵanyn jazǵan bolatynbyz.
