Tennıs: Elena Rybakına Tsıntsınnatı týrnırinde jeńilip qaldy
NUR-SULTAN. QazAqparat – Qazaqstannyń birinshi, álemniń 17-raketkasy Elena Rybakına Tsıntsınnatı (AQSh) týrnıriniń ekinshi aınalymyna shyǵa almady, dep habarlaıdy QazAqparat tilshisi.
E.Rybakına Nıý-Iorkta ótip jatqan, júlde qory 2,2 mln AQSh dollarynan asatyn iri jarystyń alǵashqy aınalymynda reıtıngte 27-orynda turǵan reseılik Ekaterına Aleksandrovamen kezdesti.
Qarsylastardyń buǵan deıin bir-aq ret joldary toqaılasyp, jyl basynda Shenchjen WTA týrnıriniń fınalynda qazaqstandyq tennısshi 2:6, 4:6 esebimen jeńilip qalǵan edi. Ol kezde E.Rybakına reıtıngte 36-orynda bolsa, E.Aleksandrova odan eki saty joǵary edi.
Degenmen E.Rybakına odan keıingi dodalardy sátti ótkizip, reıtıngte 17-orynǵa kóterilip, qazaqstandyq rekord jasaǵan edi. Alaıda naýryz aıynda koronavırýs indetine baılanysty jarystar toqtap, Elena da qarqynynan aıyrylyp qaldy.
Osy úzilisten keıin Reseıdiń birinshi raketkasy E.Aleksandrova buǵan deıin Palermo men Pragada kortqa shyǵyp úlgerse, Tsıntsınnatı alty aıdaı ýaqyt oınamaǵan qazaqstandyq sportshy úshin alǵashqy jarys edi.
E.Rybakına 21 jasta bolsa, tájirıbesi molyraq E.Aleksandrova bıyl 26-ǵa tolady, ol ári hard tósenishinde oınaýdy jaqsy kóredi.
Birinshi sette esep 2:3 bolǵan mezette dop bergen E.Rybakına qatelik jiberip, qarsylasynyń alǵa shyǵýyna jol berip qoıdy. E.Aleksandrova setke dop bergende, qazaqstandyq tennısshi qaıyra breık jasap, esepti qysqartty – 4:5. Biraq reseılik sportshy setti taǵy bir breıkpen túıindeı bildi – 7:5.
Ekinshi set áldeqaıda tartysty órbip, másele taı-breıkte sheshildi. Onda E.Rybakına setboldy paıdalana almady. Al qarsylasy múmkindigin múlt jibergen joq – 7:6 (8:6).
Báseke 1 saǵat 38 mınýtqa sozyldy.
Osylaısha qazaqstandyq tennısshi qarymta qaıtara almady. Degenmen 31 tamyzda bastalatyn AQSh-tyń ashyq chempıonatynda tabysty óner kórsetse, reıtıngide kóterileri anyq.
E.Aleksandrova ekinshi aınalymda álemniń 51-raketkasy, Polsha ókili Iga Sventek nemese reıtıngte 90-orynda turǵan amerıkalyq Krıstına Makheıldiń bireýimen sheberlik baıqasady.
Tsıntsınnatı týrnırinde jekeleı synda Qazaqstannan sondaı-aq ıÝlııa Pýtıntseva men Aleksandr Býblık synǵa túsedi.
Eske sala keteıik, budan buryn Zarına Dııas pen Mıhaıl Kýkýshkınniń Tsıntsınnatı týrnıriniń irikteý satysynda jeńilip qalǵanyn jazǵan bolatynbyz.
