Tennıs: Elena Rybakına alǵash ret Rolan Garros týrnıriniń úshinshi aınalymyna shyqty
NUR-SULTAN. QazAqparat – Qazaqstannyń birinshi, álemniń 22-raketkasy Elena Rybakına Parıjde ótip jatqan Rolan Garros týrnıriniń úshinshi aınalymyna shyqty, dep habarlaıdy QazAqparat tilshisi.
Frantsııa ashyq chempıonatynyń 21-raketkasy bolyp tirkelgen E.Rybakına ekinshi aınalymda dúnıejúzilik reıtıngide 82-orynda turǵan japonııalyq Nao Hıbınomen kezdesti.
Elena osy aıda 22-ge tolatyn bolsa, qarsylasy 26 jasta edi.
Birinshi partııany qazaqstandyq tennısshi breıkpen bastap, 3:0 esebimen alǵa shyqty. Set bitkenshe, sol basymdylyǵyn saqtap qaldy – 6:3.
Ekinshi sette esep 1:1 bolǵan mezette E.Rybakına breık jasaı aldy. Sodan keıin qarsylasyna birde-bir geım bergen joq – 6:1.
Báseke 1 saǵat 3 mınýtqa sozyldy.
Osylaısha qazaqstandyq tennısshi óz sporttyq jolynda alǵash ret Rolan Garros týrnıriniń úshinshi aınalymyna shyǵyp otyr. Ótken jyly ol ekinshi aınalymnan asa almaǵan edi.
E.Rybakına tórtinshi aınalymǵa shyǵý úshin 34 jastaǵy reseılik, reıtıngte 1096-satydaǵy Elena Vesnınamen talasady. Sábıli bolýyna baılanysty úzilisten keıin dodaǵa qosylǵan E.Vesnına úshinshi aınalymǵa oınamastan ótti. Onyń qarsylasy, álemniń 12-raketkasy, chehııalyq Petra Kvıtova jýrnalısterge suhbat beremin dep júrip, aıaǵyn aýyrtyp alyp, kútpegen jerden jarys jolynan shyǵyp qaldy.
Eske sala keteıik, budan buryn ıÝlııa Pýtıntsevanyń juptyq synda Rolan Garros týrnıriniń ekinshi aınalymyna ótkenin jazǵan bolatynbyz.
