Tennıs: Elena Rybakına Adelaıda týrnırin jeńispen bastady
NUR-SULTAN. QazAqparat – Qazaqstannyń birinshi, álemniń 14-raketkasy Elena Rybakına Adelaıda (Aýstralııa) 500 WTA týrnırin jeńispen bastady, dep habarlaıdy QazAqparat tilshisi.
Osy dodanyń 7-raketkasy bolyp tirkelgen E.Rybakına jańa jyldaǵy alǵashqy kezdesýin dúnıejúzilik reıtıngide 132-orynda turǵan aýstralııalyq Storm Sanderspen ótkizdi.
Birinshi partııada qazaqstandyq tennısshi basymdylyq tanytty – 6:4.
Ekinshisinde aýstralııalyq sportshy 6:1 esebimen ese qaıyrsa, úshinshi, sheshýshi sette E.Rybakına qarsylasyna esh múmkindik qaldyrǵan joq – 6:1.
Eki saǵatqa sozylǵan báseke barysynda Elena 9 eıs jasap, 14 breık-poınttyń beseýin paıdalana aldy. Qarsylasy 5 eıs, 4 breıkpen (13 breık-poınt) shekteldi.
E.Rybakınanyń ekinshi aınalymdaǵy qarsylasy keıin anyqtalady.
Júlde qory 535 myń AQSh dollaryna baǵalanǵan atalmysh doda 9 qańtarda márege jetedi.
Ótken jyly munda Polsha ókili Iga Sventek shveıtsarııalyq Belında Benchıchti 6:2, 6:2 esebimen utyp, jeńimpaz atanǵan bolatyn.
Eske sala keteıik, budan buryn Elena Rybakınanyń Adelaıda týrnırindegi qarsylasy anyqtalǵanyn jazǵan bolatynbyz.
