Tennıs: Dohada ótip jatqan týrnırge Qazaqstannyń úsh birdeı tennısshisi qatysýda
ASTANA. QazAqparat - 21-27 aqpan aralyǵynda Katardyń Doha qalasynda áıelder arasynda ótip jatqan tennısten halyqaralyq týrnırge Qazaqstannyń úsh birdeı ókili qatysyp, baq synaýda.
Chempıonat.kom saıtynan alynǵan málimetke qaraǵanda, Qazaqstannyń birinshi, álemniń 57-inshi raketkasy ıÝlııa Pýtıntseva alǵashqy aınalymda slovakııalyq, 1994 jylǵy Anna Shmıdlovamen kezdesedi. Bıylǵy sátsiz ótken jarystardan keıin dúnıejúzilik reıtıngte 69-ynshy satyǵa deıin syrǵyp ketken Zarına Dııas Latvııa eliniń ókili, 1997 jylǵy Elena Ostapenkomen kortqa shyǵyp, ókinishke qaraı, 1:6, 3:6 esebimen jeńilip qaldy. Al álemniń 82-inshi raketkasy ıAroslava Shvedova japonııalyq, 1994 jylǵy Nao Hıbınomen kúsh synasady.
Júlde qory 2,818 mln. AQSh dollaryn quraıtyn Doha týrnıriniń birinshi raketkasy - Avstralııa ashyq chempıonatynyń bıylǵy jeńimpazy, nemis tennısshisi Anjelıka Kerber.
Eske sala keteıik, ıA.Shvedova osynyń aldynda Dýbaıda ótken iri halyqaralyq týrnırdiń irikteý saıystarynan ótip, álemniń 13 raketkasy, ıtalıandyq Roberta Vınchıdi jeńgenimen, sodan keıin dúnıejúzilik reıtıngte 22-satyda turǵan Italııa eliniń taǵy bir ókili Sara Erranıden óte almady. Senbi kúni osy S.Erranı Dýbaı týrnıriniń jeńimpazy atandy.
