Tennıs: Dmıtrıı Popko Shymkent týrnıriniń fınalynda ese jiberdi
NUR-SULTAN. QazAqparat - Qazaqstandyq tennısshi Dmıtrıı Popko Shymkent chellendjer týrnıriniń fınalynda slovakııalyq Andreı Martınmen kortqa shyqty, dep habarlaıdy QazAqparat tilshisi.
Osy týrnırdiń tórtinshi raketkasy, 1989 jylǵy tájirıbeli A.Martın dúnıejúzilik reıtıngte 206-orynda bolsa, 22 jasar D.Popko nebári 606-satyda edi.
Birinshi partııada esep 6:5 bolǵan mezette qazaqstandyq tennısshi breık jasaı bildi - 7:5.
Ekinshi sette D.Popko taǵy bir breıkpen alǵa shyqty - 4:2. Ókinishke qaraı, qazaqstandyq tennısshi osy qarqynyn jalǵastyra almaı, A.Martınniń qos birdeı breık jasaýyna jol berip qoıdy - 4:5. Aqyry slovakııalyq tennısshi tórt geımdi qatarynan alyp, setti óz paıdasyna sheshti - 6:4.
Úshinshi, sheshýshi partııada esep 2:1 bolǵan mezette D.Popko breık jasaı aldy - 3:1. Alaıda Martın de qarap qalmady - 3:3. Sosyn urymtal sátte taǵy bir breık jasap, ózi alǵa ketti - 5:4. Sosyn matchqa dop bergende, Popkonyń breık jasaýyna múmkindik bergen joq - 6:4.
Naǵyz fınalǵa tán asa tartysty báseke úsh saǵatqa jýyq ýaqytqa sozyldy.
Osylaısha A.Martın júlde qory 54 160 AQSh dollaryna baǵalanǵan Shymkent týrnıriniń jeńimpazy atandy.
Eske sala keteıik, budan buryn Zarına Dııastyń Japonııadaǵy týrnırdiń fınalynda jeńilip qalǵanyn, Dmıtrıı Popkonyń Shymkentte sońǵy básekege joldama alǵanyn, Qazaqstannyń birinshi raketkalary Mıhaıl Kýkýshkın men ıÝlııa Pýtıntsevanyń Rım týrnırindegi qarsylastary anyqtalǵanyn jazǵan bolatynbyz.
