Tennıs: Dmıtrıı Popko Shymkent týrnıriniń fınalyna shyqty
NUR-SULTAN. QazAqparat - Qazaqstandyq tennısshiler Aleksandr Nedovesov pen Dmıtrıı Popko Shymkent chellendjer týrnıriniń jartylaı fınalynda ózara kúsh synasty, dep habarlaıdy QazAqparat tilshisi.
Osy týrnırdiń besinshi raketkasy bolyp tirkelgen, bıyl 32-ge tolǵan A.Nedovesov dúnıejúzilik reıtıngte 209-orynda bolsa, jıyrma eki jasar D.Popko 606-satyda edi.
Birinshi partııada tájirıbeli A.Nedovesov breık jasap, alǵa ketti - 3:0. Sol basymdylyǵynan ol aıyrylǵan joq - 6:2.
Ekinshi sette D.Popko ese qaıyrdy - 6:1.
Úshinshi, sheshýshi partııada esep 2:2 bolǵan mezette D.Popko breık jasaı aldy - 3:2. Sodan keıin A.Nedovesov jarysty jalǵastyrýdan bas tartty.
Tartysty báseke 1 saǵat 43 mınýtqa sozyldy.
D.Popko fınalda osy týrnırdiń birinshi, álemniń 132-raketkasy, Belarýs eliniń ókili Egor Gerasımov nemese reıtıngte 206-satydaǵy slovakııalyq Andreı Martınniń bireýimen bas júldeni sarapqa salady.
Júlde qory 54 160 AQSh dollaryn quraıtyn Shymkent týrnıri erteń márege jetedi.
Eske sala keteıik, budan buryn Zarına Dııastyń Japonııadaǵy týrnırdiń fınalyna shyqqanyn, Qazaqstannyń birinshi raketkalary Mıhaıl Kýkýshkın men ıÝlııa Pýtıntsevanyń Rım týrnırindegi qarsylastary anyqtalǵanyn jazǵan bolatynbyz.
Taǵy bir qazaqstandyq Galına Voskoboeva juptyq synda Madrıd týrnıriniń fınalyna shyǵa almady.
