Tennıs: Dmıtrıı Popko Sankt-Peterbýrg týrnıriniń shırek fınalyna shyqty
NUR-SULTAN. QazAqparat - Qazaqstandyq, reıtıngte 184-orynda turǵan Dmıtrıı Popko Sankt-Peterbýrg chellendjer týrnıriniń shırek fınalyna shyqty, dep habarlaıdy QazAqparat tilshisi.
Osy jarystyń 2-raketkasy bolyp tirkelgen D.Popko ekinshi aınalymda otandasy, reıtıngte 395-satydaǵy Denıs Evseevpen kezdesti.
Birinshi partııada Popko 6:4 esebimen jeńiske jetti. Ekinshisinde Evseev ese qaıyrdy - 6:2.
Úshinshi, sheshýshi sette breık jasaǵan Popko sol basymdylyǵynan aıyrylǵan joq - 6:4.
Qos qazaqstandyq arasyndaǵy tartysty báseke 2 saǵat 8 mınýtqa sozyldy.
D.Popko júlde qory 52 myń AQSh dollarynan asatyn dodanyń jartylaı fınalyna shyǵý úshin álemniń 226-ynshy, osy týrnırdiń 5-raketkasy, germanııalyq Rýdolf Melleker nemese reıtıngte 332-satydaǵy chehııalyq Irjı Lehechkanyń bireýimen talasady.
Eske sala keteıik, budan buryn E.Rybakınanyń Dýbaı týrnıriniń úshinshi aınalymyna shyǵa almaǵanyn, tennısten el chempıonatynda jartylaı fınalǵa kimder ótkenin jazǵan bolatynbyz.
