Tennıs: Dmıtrıı Popko reıtıngide joǵary kóterildi
NUR-SULTAN. QazAqparat – Qazaqstandyq tennısshilerdiń jańartylǵan reıtıngidegi oryndary belgili boldy, dep habarlaıdy QazAqparat tilshisi.
Kásibı tennısshiler qaýymdastyǵy (ATP) málim etkenindeı, erler arasynda burynǵysha serbııalyq Novak Djokovıch kósh bastasa, ıspanııalyq Rafael Nadal ekinshi, aýstrııalyq Domınık Tım úshinshi orynda keledi.
Qazaqstannyń birinshi raketkasy Aleksandr Býblık 51-den 54-satyǵa syrǵysa, Mıhaıl Kýkýshkın 90-orynda qaldy.
Ótken aptada Praga 2 týrnıriniń jartylaı fınalyna deıin jetken Dmıtrıı Popko 178-den 165-orynǵa kóterildi.
Juptyq syn boıynsha M.Kýkýshkın 77-den 80-ge, A.Býblık 100-den 104-ke, Aleksandr Nedovesov 132-den 134-ke tómendese, jýyrda Italııadaǵy týrnırdiń jeńimpazy atanǵan Andreı Golýbev 111-den 103-ke joǵarylady.
Áıelder tennıs qaýymdastyǵy (WTA) jarııalaǵan reıtıngide Qazaqstannyń birinshi raketkasy Elena Rybakına 17-ornynda qalsa, ıÝlııa Pýtıntseva 33-ten 35-ke, Zarına Dııas 66-dan 69-ǵa syrǵydy.
Aýstralııalyq Eshlı Bartı, rýmynııalyq Sımona Halep jáne chehııalyq Karolına Plıshkova burynǵysha úzdik úshtikte.
Juptyq syn boıynsha Galına Voskoboeva 62-inshi, Anna Danılına 126-orynda bolsa, ıÝ.Pýtıntseva 171-den 172-ge tómendedi.
Qazaqstandyq tennısshiler búgin bastalatyn AQSh-tyń ashyq chempıonatynda (júlde qory – 53,4 mln dollar) sátti óner kórsetse, reıtıngilik upaıǵa kóbirek ıe bolyp, kórsetkishterin jaqsartady.
Qazaqstandyqtardan alǵashqy bolyp kortqa A.Býblık pen M.Kýkýshkın shyǵady. 1 qyrkúıekke qaraǵan túni A.Býblık ulybrıtanııalyq Kaıl Edmýndpen, M.Kýkýshkın majarstandyq Atılla Balashpen kúsh synasady.
Eske sala keteıik, budan buryn qazaqstandyq tennısshilerdiń AQSh-tyń ashyq chempıonatyndaǵy qarsylastary belgili bolǵanyn, Anna Danılınanyń Praga jarysyn jeńispen bastaǵanyn jazǵan edik.
