Tennıs: Dmıtrıı Popko Kıev týrnıriniń shırek fınalyna ótti
NUR-SULTAN. QazAqparat – Qazaqstandyq, álemniń 193-raketkasy Dmıtrıı Popko Kıev chellendjer týrnıriniń shırek fınalyna ótti, dep habarlaıdy QazAqparat tilshisi.
Osy jarystyń 4-raketkasy bolyp tirkelgen D.Popko ekinshi aınalymda dúnıejúzilik reıtıngte 342-orynda turǵan ıtalııalyq Franchesko Fortımen kezdesti.
Saǵat jarymnan astam ýaqytqa sozylǵan matchta qazaqstandyq tennısshi 7:5, 6:2 esebimen jeńiske jetti.
Báseke barysynda D.Popko 11 breık-poınttyń altaýyn paıdalandy. Qarsylasy 1 eıs jasap, 3 breıkke qol jetkizdi.
D.Popko jartylaı fınalǵa shyǵý úshin reıtıngte 347-satydaǵy túrkııalyq Ergı Kırkınmen talasady.
Eske sala keteıik, budan buryn Tımofeı Skatovtyń Kıev týrnıriniń shırek fınalyna shyqqanyn jazǵan bolatynbyz.
T.Skatovtyń shırek fınaldaǵy qarsylasy – portýgalııalyq Nýno Borges.
