Tennıs: Dmıtrıı Popko Almaty týrnıriniń shırek fınalyna ótti
NUR-SULTAN. QazAqparat – Qazaqstandyq, álemniń 195-raketkasy Dmıtrıı Popko Almaty chellendjer týrnıriniń shırek fınalyna shyqty, dep habarlaıdy QazAqparat tilshisi.
Osy dodanyń 6-raketkasy bolyp tirkelgen D.Popko ekinshi aınalymda dúnıejúzilik reıtıngte 338-orynda turǵan 19 jastaǵy rýmynııalyq Fılıp Jııanýmen sheberlik baıqasty.
Qazaqstandyq tennısshi birinshi partııany breıkpen bitirdi – 7:5.
D.Popko ekinshi setti de breıkpen bastady – 2:0. Aqyry osy basymdylyqty saqtap qala aldy – 6:3.
Birshama tartysty ótken báseke 1 saǵat 53 mınýtqa sozyldy.
D.Popko jartylaı fınalǵa shyǵý úshin álemniń 108-inshi, osy jarystyń 1-raketkasy, slovakııalyq Andreı Martınmen talasady. Qazaqstandyq sportshy úshin sheshýshi kezdesýdiń biri osy bolmaq.
Eske sala keteıik, budan buryn Tımofeı Skatovtyń Almaty týrnıriniń shırek fınalyna shyqqanyn, Elena Rybakınanyń juptyq synda Rolan Garros jarysynyń jartylaı fınalyna óte almaǵanyn jazǵan bolatynbyz.
Sondaı-aq qazaqstandyq tennısshi Slovakııadaǵy týrnırdiń shırek fınalyna shyqty.
