Tennıs: Devıs kýbogy saıysynda M.Kýkýshkın Serbııamen matchta esepti teńestirdi
ASTANA.QazAqparat - Belgradta ótip jatqan Devıs kýbogynyń 1/8 saıysynda Serbııa men Qazaqstan arasyndaǵy ekinshi oıynda Mıhaıl Kýkýshkın qarsylasy Vıktor Troıtskıdi úsh partııada utty.
«Qazsport» telearnasynan tikeleı efırde kórsetkenindeı, alǵashqy partııany Qazaqstannyń birinshi raketkasy 7:5, ekinshisin 6:2 esebimen utty. Úshinshi, sheshýshi partııada 3:0 esebimen alǵa shyqqan Mıhaıl kezdesýdi ońaı utatyndaı kóringen. Biraq budan keıin onyń qarqyny báseńdep, serbııalyq tennısshi esepti 2:3-ke deıin qysqartty. Osydan keıin kezdesý tizginin qaıta qolǵa alǵan M.Kýkýshkın esepti 5:2-ge jetkizdi. Alaıda ózi dop bergende, bul basymdylyqty paıdalana almady. Esep 4:5-ke deıin taǵy qysqardy. Degenmen osy sátte jeńiske degen jigeri men qaısarlyǵyn tanyta bilgen qazaqstandyq tennısshi sheshýshi geımdi uta bildi. Sóıtip sońǵy partııa 6:4 esebimen qazaqstandyq tennısshiniń paıdasyna aıaqtaldy. 2 saǵat 37 mınýtqa sozylǵan matchta álemniń 79-ynshy raketkasy M.Kýkýshkın dúnıejúzilik reıtıngte ózinen áldeqaıda joǵary, ıaǵnı 23-inshi orynda turǵan V.Troıtskıdi tize búktirip, esepti teńestirdi.
Munyń aldynda álemniń birinshi raketkasy Novak Djokovıch qazaqstandyq Aleksandr Nedovesovti úsh partııada (6:1, 6:2, 6:3) ońaı utyp, Serbııa quramasyn 1:0 esebimen alǵa shyǵarǵan edi.
5 naýryz kúni juptyq kezdesý ótedi.
