Tennıs: Devıs kýbogy kezdesýinde M.Kýkýshkın - N.Djokovıch oıyny bes partııaǵa sozyldy
ASTANA. QazAqparat - Belgradta ótip jatqan Devıs kýbogynyń 1/8 saıysynda Serbııa men Qazaqstan arasyndaǵy tórtinshi kezdesýde álemniń birinshi raketkasy Novak Djokovıch pen dúnıejúzilik satyda 79-ynshy orynda turǵan Mıhaıl Kýkýshkın kúsh synasty.
«Qazsport» telearnasynan tikeleı efırde kórsetkenindeı, reıtıngtegi aıyrmashylyqqa qaramastan, atalmysh match asa tartysty órbidi. Birinshi partııada qazaqstandyq tennısshi taıbreıkte jeńiske jetse, ekinshisinde serbııalyq oıynshy osyndaı sátti qur jibermedi. Úshinshi partııada M.Kýkýshkın 6:4 esebimen qarsylasyn utsa, tórtinshisinde 6:3 esebimen N.Djokovıch esepti teńestirdi. Besinshi, sheshýshi partııada Novak eki márte breık jasap, 6:2 esebimen qazaqstandyq tennısshini tize búktirdi.
Sóıtip bes saǵatqa jýyq ýaqytqa sozylǵan kezdesýde M.Kýkýshkın ataqty qarsylasyna qatty qarsylyq kórsetkenimen, N.Djokovıch 3:2 esebimen jeńiske jetti. Qazaqstan-Serbııa arasyndaǵy esep qaıtadan (2:2) teńesti.
Endi sońǵy, sheshýshi kezdesýde qazaqstandyq Aleksandr Nedovesov pen serbııalyq Vıktor Troıtskıdiń qaı jeńgeni óz komandasyn kelesi aınalymǵa shyǵarady.
