Tennıs: Devıs kýbogy kezdesýinde Qazaqstan quramasy 2:1 esebimen alǵa shyqty
ASTANA.QazAqparat - Belgradta ótip jatqan Devıs kýbogynyń 1/8 saıysynda Serbııa men Qazaqstan arasyndaǵy úshinshi, juptyq kezdesýde Aleksandr Nedovesov pen Andreı Golýbev Novak Djokovıch pen Nenad Zımonıchpen sheberlik baıqasty.
«Qazsport» telearnasynan tikeleı efırde kórsetkenindeı, qazaqstandyq jup bul matchta aıdy aspanǵa shyǵaryp, 6:3, 7:6, 7:5 esebimen qarsylastaryn úsh partııada utty.
Tamasha oınaǵan A.Nedovesov pen A.Golýbev ekinshi partııada taı-breıkti óz esepterine jazsa, úshinshi, sheshýshi sette esep 6:5 bolyp turǵan sátte breık jasap, kezdesýdi kóp sozbaı, aıaqtaı bildi. Úshinshi partııa barysynda álemniń birinshi raketkasy N.Djokovıchtiń qapalanǵany sondaı, raketkasyn kortqa uryp, syndyrdy.
Sóıtip, úsh kezdesýden keıin Qazaqstan quramasy 2:1 esebimen alǵa shyqty. Qaı quramanyń shırek fınalǵa shyǵatyny qalǵan eki oıynda sheshiledi. 6 naýryz kúni aldymen Novak Djokovıch pen Qazaqstannyń birinshi, álemniń 79-ynshy raketkasy Mıhaıl Kýkýshkın kúsh synassa, sodan keıin Aleksandr Nedovesov pen Vıktor Troıtskı kortqa shyǵady. Osy eki kezdesýdiń birinde qazaqstandyq tennısshi jeńse, onda Qazaqstan quramasy kelesi kezeńge joldama alady.
